O MUSEO Arqueolóxico de Ourense na nosa MEMORIA

 O Museo Arqueolóxico Provincial de Ourense pese a vivir unha situación máis propia dunha película de Buñuel, despois de case unha década fora da súa sede, segue a programar actividades de formación e difusión de cara á cidadanía. Xa en varias entradas pasadas comentábamos a aposta renovadora dos obradoiros de verán para rapaces. Unha actividade promovida pola nosa compañeira Begoña Garrido que descansa na vangarda da arqueoloxía galega, completando a triada funcional clásica da xestión, investigación e difusión coa esquecida didáctica. Mágoa que en tempos de crise o primeiro sitio onde meter a tesoira sexa no eido cultural, agás nos consabidos proxectos megalómanos, índa que ese xa é outro tema... :+

 O pasado mércores 18 de maio foi o Día Internacional do Museo. O tema escollido este ano era Museo e Memoria e para celebralo o Arqueolóxico de Ourense organizou dúas actividades paralelas que podedes albiscar nos vídeos axuntos: unha na Sala de San Francisco e outra no Laboratorio de Restauración do centro, sito en Santa María de Europa. Nós tivemos a oportunidade de asistir á segunda, unha acción guiada dun xeito loable polo Conservador-Restaurador Lois Méndez amosándonos o seu quefacer. Con todo, ámbalas dúas actividades contaron cun notable éxito de participación amosando que o MUSEO índa segue vivo na MEMORIA cidadá malia o seu esquecemento noutras esferas. ;)

O Mosteiro de Santa Cristina de Ribas de Sil na Idade Media

  

Nâo sâo pepitas de oiro que procuro, 

Oiro dentro de mim, terra singela!

Busco apenas aquela

Universal riqueza 

Do homem que envolve a solidâo

O tesoiro sagrado 

De nenhuma certeza 

Soterrado 

Por mil certezas de aluviâo. 

(Fragmento do poema "Prospecçao". Miguel Torga). 

 Con estas fermosas verbas preséntase un novo número -o 32 xa- dos Anexos do Boletín Auriense promovido polo Grupo Marcelo Macías de Colaboradores do Museo e Arquivo. Unha monografía que recolle a colección documental do Mosteiro de Santa Cristina de Ribas de Sil ó tempo que procura unha síntese histórica da súa evolución. 

 Esta extraordinaria achega, realizada polo noso colega Víctor Rodríguez Muñíz, constrúese tanto dende unha óptica interna como analizando as relacións do enclave monástico co seu rico entorno, do que o propio autor xa nos falaba na súa comunicación das I Xornadas de Novos Investigadores do Noroeste e que agardamos poder pescudar con máis tempo na pronta publicación das actas na serie de Anejos Herakleion.  

 Sempre é pracenteiro para nós albiscar como a "canteira" de investigadores vencellados á Facultade de Historia da Universidade de Vigo "seguen na brecha" esquivando as numerosas trabas dos "mercados". Dende o LAUV parabéns Víctor!!   

 Rodríguez Muñíz, V. (2010): O mosteiros de Santa Cristina de Ribas de Sil na Idade Media, Grupo Marcelo Macías-Serie Anexos Boletín Auriense, Ourense, ISBN: 978-84-88522-28-3.

Lembranzas gráficas...

 Rematado o I Curso Práctico de Metodoloxía Arqueolóxica: rexistro e análise de xacementos e materiais, e no tempo que agardamos polo II, colamos aquí unha escolma de fotografías das actividades -a modo de lembranza gráfica dunha boa semana-. Moitas gracias a tod@s pola vosa participación baixo as temperaturas características da cidade "auria". Bo verán!!!!!!!!!!! 

"De ética e moralidade vai o conto..."

 No xornal La Voz de Galicia.es do 15/06/2010 veñen de publicar unha entrevista a nosa compañeira Ana Cebreiros quen, ó abeiro da dinámica Área de Historia Contemporánea da Universidade de Vigo, está a visibilizar a labor da Sección Femenina de Ourense. Unha célula básica na correa de transmisión dos valores falanxistas.  Un proxecto  social que enxergamos prometedor e no que albiscamos boas e interesantes empresas colectivas multidisciplinares.

Obradoiros de verán para rapaces no Museo Arqueolóxico Provincial de Ourense

   Nun ano de recortes e tesoiradas énchenos de ledicia comprobar na páxina web do Museo Arqueolóxico Provincial de Ourense que a actividade promovida pola nosa compañeira Begoña Garrido mantén o seu posto na grella de actividades formativas da institución. Dende o LAUV agardamos que esta aposta renovadora, didáctica e activa, acade un ano máis unha alta participación cidadá. 

 + info: http://www.musarqourense.xunta.es/?mod=nova&id=129

 

Como inscribirte?

Normas básicas da inscrición

Débese cubrir correctamente a folla de inscrición e presentala antes do comezo do obradoiro, xunto con: fotocopia do DNI, da cartilla da seguridade social e unha foto carné.

Respectarase a orde de inscrición.

Deberase confirmar a asistencia unha semana antes do comezo do obradoiro. No caso de non facelo a praza será posta a disposición doutros interesados.

O museo resérvase o dereito de introducir modificacións en horarios ou cancelar a celebración dos obradoiros no caso de non acadar un mínimo de participantes.

Recomendacións

Puntualidade (Deben respectarse os horarios fixados, pois o retraso afectaría negativamente ó desenvolvemento normal do obradoiro )

Aconséllase traer roupa cómoda.

Recoméndase traer unha merenda e bebida para o descanso.

Débense acatar as normas de comportamento expostas. No caso de non facelo, o Museo resérvase o dereito de expulsión.

É PARA OS COLES !

O MUSEO VAI AO COLE !

Realizarase en : outubro e novembro.

Débese concertar cita previamente.

Seguindo coa liña de achegamento aos máis novos ao Museo Arqueolóxico, proponse visitar aos colexios que así o soliciten.

Nesta visita, non só se fará unha explicación dos restos arqueolóxicos da provincia, senón que tamén terán a oportunidade de realizar algúns dos talleres didácticos propostos

UNHA VISITA POLO

PAZO DO BISPO

Realizarase nos mes de outubro e novembro

Previa solicitude dos centros

Dedicado a todos os centros de educación.

Visita guiada polos restos arqueolóxicos do Museo Arq. Provincial de Ourense.

Duración aproximada: 1h 30 min.

Lugar de inscrición (prazas limitadas)

Na sala “ Escolma de Escultura” situada no antigo Mosteiro de San Francisco

Horario: De martes a sábado 9:30 a 14:30 // 16:00 a 21:00

673 50 25 36

Horarios dos obradoiros

De martes a venres .

Das 10:00 ás 13:30 hs e das 17:00 ás 20:00 hs

Número de información

673 50 25 36

Horario de atención:

Das 9:00 ás 14:00 e das 16:3O ás 20:30

Catálogo do patrimonio cultural da Alta Limia.

  Resultado do convenio de colaboración 2006-2007 entre a Fundación Pedro Barrié de la Maza e o Grupo Marcelo Macías do Museo Arqueolóxico de Ourense implementábase o Proxecto de Catalogación do Patrimonio Cultural da Alta Limia ourensá. Como consecuencia directa de tal proceder chega ata nós na actualidade, aínda en fase experimental, unha nova ferramenta en rede que permite acceder a tódalas fichas dos bens patrimoniais catalogados nesta zona. Un proxecto que sumado ás posibilidades abertas anos atrás por ARQUEOGENITIO, como sistema de información da arqueoloxía urbana da cabeceira comarcal, a caracteriza como un dos espacios galegos con mellores  posibilidades para a investigación, xestión e posta en valor do seu patrimonio arqueolóxico.

A Bela Auria: unha paisaxe cultural de preguerra

  A Asociación de Licenciados e Estudiantes de Historia de Ourense -ALEHOU-, pulo dinamizador de tódalas actividades do LAUV, ven de presentar as primeiras Xornadas de Historia Contemporánea da Festa da Historia de Ourense baixo o título A historia dentro da historia. Unha actividade enmarcada dentro dun proxecto máis amplo como é A Bela Auria, unha festa de recreación histórica ambientada no Ourense da xeración Nós e agrupada en bloques temáticas diferentes:

- A propia Bela Auria que amosará actividades situadas cronolóxicamente a comezos do século pasado a modo de exposicións, actuacións musicais...

- Saberes Perdidos a modo de obradoiros que procuran amosar o coñecemento artesanal dunha sociedade menos industrializada como a do Ourense de preguerra. 

- A xornada de A Historia dentro da Historia que contará coas intervencións do arqueólogo municipal José María Eguileta e da nosa compañeira Ana Cebreiros, entre outros,  co Ourense do século pasado e o papel da muller no franquismo como eixos das súas palestras. 

 Dende aquí queremos animar a tódolos interesados a asistir vestidos de época e disfrutar dunha máis que interesante proposta cultural e de lecer. 

+ info: 

web: http://www.belaauria.com/

blog: http://belaauria.wordpress.com/