Laboratorio de Arqueoloxía da Universidade de Vigo

Fin da temporada invernal en Armea

2011-12-23T19:00:00.000+01:00

Hoxe rematamos o traballo programado para a campaña invernal no Monte do Señoriño en Armea na que pretendíamos consolidar os muros destapados no verán e protexer as estructuras da colonización vexetal. Este é o aspecto que terá o xacemento até o noso regreso no verán de 2012:

Se ben o noso obxectivo non era restaurar as estructuras descubertas, xa que a complexidade do conxunto non permite polo momento unha lectura definitiva, a simple actuación de consolidación dos muros e o recheo dos buracos da rocha, para facilitar a drenaxe das augas, xa fai moito máis comprensible o xacemento. Botádelle un ollo:

Resultado da consolidación e recheo do Socalco Inferior

Resultado da consolidación e recheo do Socalco Intermedio

Por outra banda na escavación do sector que une os socalcos inferior e intermedio non achamos ningunha mostra clara de acceso, pero si diferentes fragmentos de cerámica en contexto que sirven para datar o nivel de uso do lugar. O traballo de laboratorio de seguro confirmará que seguimos arredor do cambio de era e século I d.C. Asemade localizamos restos de diferentes muros que garanten a continuidade do xacemento arqueolóxico ó mediodía e permítenos albiscar a posible construcción realizada sobre a estructura rupestre. Con todo só novas campañas de escavación permitirán respostar as cuestións de uso e funcionalidade.

Resultado da escavación da testemuña entre os Soc. Inferior e Intermedio

P.D. Os resultados da restitución fotogramétrica e modelado 3D de todos os socalcos, o levantamento topográfico do outeiro, o SIX de poboamento prerromano e galaico-romano da contorna... están en camiño. ;)

Sexta xornada invernal en Armea: ...e chegou o xeo

2011-12-19T18:47:00.000+01:00

A xeada dános a benvida ó xacemento o luns 19 de decemebro

Tod@s @s que vos adicades a isto sabedes da complicación de escavar no inverno. Ás dificultades derivadas da chuvia, das que vimos sobrados exemplos a semana pasada, súmanse as mañás frías con termómetros próximos ó 0ºC. Malia todo, e como a xeada é o mellor indicador dun día soleado, hoxe si puidemos traballar... e moi ben por certo jejejeje... Así pois estamos a rematar de consolidar os muros descubertos na campaña estival e pronto empezameramos coa limpeza de mofos e demais "invasores" para darlle un bo lavado de cara á estrutura rupestre.

Por outra banda, e como podedes observar nas fotografías adxuntas, na escavación da testemuña separadora entre os socalcos intermedio e inferior localizamos, xunto con abundantes fragmentos de cerámica, dous novos muros (ou o que queda deles) que complican aínda máis unha lectura vertical da estrutura. Cada nova dentada de terra formula novas preguntas en vez de responder a todas as que xa temos. :S

Restos do muro que semella conectar os Soc. Inf. e Intermedio

Restos dun pequeno muro paralelo ó banco central

Quinta xornada invernal en Armea: chegou o nadal!!!

2011-12-17T20:33:00.000+01:00

Se o martes foi un día gris e o mércores un día de cores en Armea, o venres chegou o verdadeiro inverno!!! Poucas novidades máis aló das rachas de aire, chuvia, frío... brbrbrbrbrb... alomenos aproveitamos para felicitavos as festas. ;)

Cuarta xornada en Armea: as visitas

2011-12-17T20:22:00.000+01:00

A brigada de canteiros do Concello de Allariz dános unha auténtica lección

Sempre dixemos que as visitas deben ser un elemento esencial en calquer escavación arqueolóxica. Non falamos aquí das visitas nas que procuramos visibilizar o noso traballo e inducir na sociedade un desexo de protección do patrimonio, senón desas outras visitas de compañeir@s de profesión que poñen en dúbida o noso discurso. Destas tivemos moitas no verán e de todas aprendimos algo (Marco García e Antonio Colmenero da USC, Francisco Fariña do Museo Arqueolóxico de Ourense... e un grande número de arqueólogos aos que queremos agradecer a súa axuda desinteresada), pero ás veces esquecemos a necesidade de inserir nestas visitas a outros profesionais que aporten un pouco de aire fresco lonxe da teoría dos nosos libros. Nós tivemos o xoves 15 de decembro unha destas visitas, a da brigada de canteiros do Concello de Allariz que ficaron atordados co esforzo necesario para facer estas estruturas rupestres e deixáronnos algunhas reflexións interesantes que teremos que meditar.

Cuarta xornada en Armea: o paseo

2011-12-17T20:01:00.000+01:00

Adolfo e Manuel "de paseo" arqueolóxico

Como non todo vai ser traballar... o xoves 15 de decembro aproveitamos o último en sistemas de información xeográfica (o coñecemento do lugar de Manuel Losada, "o catedrático de Armea") para dar un paseo e deleitarnos cos segredos do conxunto arqueolóxico no que se enmarca o Monte do Señoriño. Xulgade vós:


Rúa recuperada polos colegas Celso e David que pode dar unha idea da monumentalidade do castro

Estruturas escavadas por F. Conde-Valvís nos anos 50 recuperadas por Celso e David

Posible lagar descuberto por Manuel Losada

Detalle do posible lagar

Terceira xornada en Armea: o arco da vella

2011-12-15T01:10:00.000+01:00

O arco da vella dende o Monte do Señoriño

Se onte foi un día gris hoxe de cores...o noso traballo xa comeza a dar algúns resultados!! Rematado o "encintado" do muro do socalco inferior saltamos ó intermedio. Asemade na retirada do testigo, previo "traballo fino" de retirada de tocón, comezamos a albiscar novos muros que se ben atópanse moi arrasados seguen a aumentar as fichas do complexo puzzle estrutural do conxunto rupestre.

Manuel e Edu rematando co "encintado" do soc. inferior

"Madriña!!!! ...que choio cos tocóns que temos aquí"

Pouco a pouco a testemuña esmorece e xurden as estruturas

Segunda xornada invernal en Armea

2011-12-13T20:11:00.001+01:00

Hoxe foi un día gris en Armea, un día clásico de inverno no interior. Se ben seguimos co "encintado" dos muros e retirando as primeiras camadas de terra da testemuña entre socalcos, a chuvia condicionou moito o noso traballo. Se cadra a mellor imaxe que recollimos nesta xornada foi a que vos axuntamos abaixo.

Vista do conxunto arqueolóxico de Armea dende Taboadela

Tornamos a Armea

2011-12-12T23:25:00.000+01:00

Hoxe tornamos ó conxunto rupestre do Monte do Señoriño en Armea para iniciar unha pequena campaña de 15 días, financiada en exclusiva polo Concello de Allariz, na que pretendemos consolidar os muros destapados no verán e protexer o xacemento da colonización vexetal.

Namentres agardamos por futuras intervencións de restauro máis profundas, só unha vez definidas tódalas estruturas visibles, o obxectivo perseguido neste mes de decembro é que as "inclemencias meteorolóxicas" do inverno non deterioren as poucas evidencias construtivas non rupestres que temos. Asemade aproveitaremos para escavar o sector que une os socalcos inferior e intermedio. Acharemos un novo acceso? ...se cadra, pero como non todo é escavar aproveitamos o tempo restante para implementar algúns métodos de rexistro e documentación de todo o xacemento: restitución fotogramétrica e modelado 3D de todos os socalcos, levantamento topográfico do outeiro, xeración dun SIX de poboamento prerromano e galaico-romano da contorna... Todo con programas "free" e gracias o "free-voluntarismo" do equipo, porque nós seguimos "apretando o cinto..." glups!!!!!! ;)

"Coas mans na masa"
Morteiro de cal con tintura do lugar usado na consolidación dos muros

Vista da testemuña entre socalcos obxecto de escavación arqueolóxica

Tirando fotografías para o seu posterior modelado virtual

Inscrición Deutschland 2012

2011-12-02T01:44:00.003+01:00

"MEDIDAS ANTICRISE OIA, 7 DÍAS EN ALEMAÑA POR 375 Euros!!!!!!"

Como sabedes dende o LAUV-GEAAT, xunto coa Delegación de Alumnos da Facultade de Historia de Ourense, estamos a xestionar de novo unha viaxe de estudios arqueolóxicos. Botádelle un ollo ó programa deste ano:

IMPORTANTE:

Poderán participar na viaxe preferentemente profesores, investigadores, egresados e alumnos de Historia da Uvigo (grao, licenciatura, máster/doutoramento), así como tamén procedentes doutras licenciaturas e/ou universidades.
O número máximo de prazas dispoñibles é de 20 (4 automobiles).
PRAZO DE INSCRICIÓN PECHADO

Intervencións no conxunto arqueolóxico, histórico-artístico e natural de Armea

2011-11-21T20:50:00.000+01:00

O Concello de Allariz, nunha nova mostra de sensibilidade polo seu patrimonio, convidounos a presentar os primeiros resultados da nosa intervención deste verán no conxunto rupestre do Monte do Señoriño de Armea (Santa Mariña de Augas Santas, Allariz). Alén disto teremos a oportunidade tamén de coñecer de primeira man os interesantes achados dos colegas Celso e David na zona escavada por F. Conde-Valvís a mediados do século XX. O encontro terá lugar no Fogar do Maior de Allariz o vindeiro 2 de decembro de 2011. Animádevos a asistir!! ;)

Deutschland 2012

2011-11-18T11:25:00.000+01:00

Despois da excelente experiencia da England Archaeological Tour 2010 e da exótica ruta por Estambul e a costa xonia da Türkiye 2011 o LAUV-GEAAT, xunto coa Delegación de Alumnos da Facultade de Historia de Ourense, xestionará de novo unha viaxe de estudios arqueolóxicos. Nesta ocasión o destino final será o limes xermánico!!!!

Continuando coa filosofía "low-cost" doutros anos a viaxe será autoxestionada, é dicer, lonxe de viaxes programados por axencias. A data xirará arredor do entroido de 2012 e o precio total non superará os 400 Eur. (con viaxe, aloxamento e visitas incluídas). Se estas interesad@ en asistir fica atent@ ás plataformas de difusión do grupo (redes sociais, blogue...).

Seguimos mellorando a grella da TV...

2011-10-29T03:51:00.000+02:00

A UVigo.tv, na súa mediateca pública, vén de presentar a posibilidade de descarga e visionado das palestras presentadas no Curso de Verán: Castros do Interior: a Idade do Ferro do NO peninsular a través do exemplo limiao celebrado na vila de xinzo o pasado mes de xuño. ;)

Poñendo as cousas en orde...

2011-10-25T20:45:00.000+02:00

Despois do productivo III EDESCANOP tentamos agora poñer un pouco de orde na rede que a temos un pouco esquecida... ;)
Para comezar aquí fica o pdf prometido co aparato gráfico da primeira comunicación pública sobre a nosa intervención do verán defendida nas IX Xornadas Castrexas de Cambre: O xacemento rupestre do Monte do Señoriño: un novo valor ao conxunto patrimonial de Armea (Santa Mariña de Augas Santas, Allariz). Pronto tornaremos ó xacemento para consolidar os muros e facer as drenaxes de cara o inverno. Asemade o estudio do material segue en marcha e... máis, moito máis... pronto veredes máis!!

Open publication - Free publishing - More armea

IX - Xornadas Castrexas de Cambre

2011-10-07T11:18:00.000+02:00

Mañá marchamos a Cambre (A Coruña) onde fomos convidados para participar nas súas Xornadas Castrexas, nin máis nin menos que á IX edición, coa ponencia O xacemento rupestre do Monte do Señoriño: un novo valor ao conxunto patrimonial de Armea (Santa Mariña de Augas Santas, Allariz). Será a primeira comunicación pública sobre a nosa intervención do verán, só un par de meses despois. Con todo, pese a esta premura, algunha que outra novidade presentaremos... ;)

Premede aqui para descargar o programa completo e animádevos a asistir!!! ...compartiremos mesa tamén cos colegas da Lanzada. Unha oferta litoral-interior ideal para un sábado pola mañá. Ou non??

Ó tornar poremos á vosa disposición a nosa presentación, para quen non goste de madrugar os sábados. ;)

Últimas prazas dispoñibles para asistir ó IIIº Encontro De Estudios Sobre Cerámica Antiga Do Noroeste Peninsular

2011-09-28T10:55:00.000+02:00

Xa somos 37 @s inscrit@s para participar no obradoiro teórico-práctico sobre ánforas de época romana a celebrar na cidade de Ourense o 13 e 14 de Outubro de 2011, superando deste modo todas as previsións de participación. Malia isto, e co obxectivo de achegar esta actividade a un maior número de interesad@s na temática, abrimos un último prazo de inscrición até o luns 3 de outubro para os máis "indecisos". Chegaremos ós 40??

Xa sabedes, máis info e formulario de inscrición aquí: http://webs.uvigo.es/lauv-web/IIIEDESCANOP

Xa temos programa para o III EDESCANOP...

2011-09-08T21:28:00.001+02:00

Tal e como comentábamos onte aquí fica o programa e método de inscrición do III EDESCANOP:

+ info: http://webs.uvigo.es/lauv-web/IIIEDESCANOP

IIIº Encontro De Estudios Sobre Cerámica Antiga Do Noroeste Peninsular, vai facendo un sitio na túa axenda...

2011-09-07T20:23:00.000+02:00

Xa estamos de volta e toca tornar ó traballo... :(

Namentres seguimos a lavar e procesar o material recuperado na escavación do Conxunto Rupestre do Monte do Señoriño (Armea, Allariz) o pasado mes de xullo, do que damos boa conta en tempo real nas redes sociais e do que pronto teredes novas neste blogue; xa estamos dando as últimas pinceladas ó futuro Encontro De Estudios Sobre Cerámica Antiga Do Noroeste Peninsular -EDESCANOP-. Unhas xornadas formativas, as terceiras xa, cun grande éxito de participación.

Estos encontros xurdiron no ano 2007 como plataforma de reunión e discusión de especialistas en estudios cerámicos do Noroeste, e como tal, celebrouse o primeiro EDESCANOP. Os organizadores optamos, dous anos despois (2009), por trocar o enfoque cara un encontro concibido como unha actividade formativa, teórica e práctica, destinada a cubrir baleiros formativos de profesionais da arqueoloxía, estudiantes de historia e investigadores en xeral. Con este obxectivo en mente, o IIº EDESCANOP artellouse sobre a figura do máis importante experto sobre a cerámica tardorromana de produción africana: Michel Bonifay. Da man deste investigador e doutor no Centre National De La Recherche Scientifique (CNRS), durante dúas xornadas, achegouse a cerámica africana de época romana aos máis de 30 participantes.

O alto número de matrículas superaba todas as nosas expectativas. Entre os asistentes atopamos un nutrido grupo de profesionais da arqueoloxía, estudiantes das tres universidades galegas, amais de persoal de distintas institucións ligadas á arqueoloxía (Museos, Deputacións, Concellos…etc.). Todos conscientes, e así nolo comunicaron, da oportunidade que lles brindaba o IIº EDESCANOP como unha actividade única na nosa comunidade e tremendamente útil para a súa formación e profesión.

Co IIIº EDESCANOP pretendemos satisfacer de novo estas demandas formativas, detectadas xa na pasada edición de 2009, recollendo o seu interese en organizar un curso teórico/práctico sobre as ánforas de época romana. Non obstante, o universo anfórico antigo é tremendamente amplo e complexo, polo que foi necesario acoutar o marco do IIIº EDESCANOP únicamente ás ánforas romanas de produción peninsular (Béticas e Lusitanas) deixando para futuras edicións outras produción anfóricas mediterráneas –tamén documentadas no NO−, en especial as orientais, unha vez que as ánforas producidas na Tunisia xa foron tratadas no 2009.

Para cubrir todo este panorama anfórico peninsular de época antiga dende unha achega teórica e práctica, o IIIº EDESCANOP medra considerablemente con respecto a edicións pasadas. É por isto que a actividade desenvolverase en dúas xornadas: o xoves 13 e venres 14 de outubro de 2011, guiadas polos meirandes especialistas das tres zonas produtoras máis importantes (coa inclusión das producións da Galicia, minoritarias respecto ás outras pero de enorme interese para a nosa comunidade científica):

- O profesor da Universidade de Sevilla D. Enrique García Vargas para as producións do val do Guadalquivir.

- O profesor da Universidade de Cádiz, D. Darío Bernal Casasola quen abordará as producións anfóricas da zona costeira de Andalucía occidental.

- O profesor da Universidade de Lisboa (FLUL), D. Carlos Fabião quen exporá a realidade sobre as producións anfóricas da Lusitania, amais de abordar as producións locais/rexionais.

- O profesor da Universidade do Minho, D. Rui Morais quen exporá a realidade sobre as producións anfóricas locais/rexionais do NO.

Pronto colaremos aquí máis información sobre como inscribirse e o programa definitivo. Namentres vai facendo un sitio na túa axenda... ;)

Damos un paseo???

2011-08-16T13:35:00.000+02:00

O II Encontro de Cesteiros, organizado polo Concello de Allariz e celebrado na fermosa vila de Santa Mariña de Augas Santas os días 13 e 14 de Agosto, foi todo un éxito de participación. Até alí achegámonos nós o sábado para, xunto con preto de cen asistentes "locais e visitantes" como dirían @s colegas de Barxacova, aprender a diferenciar algunhas das especies moldeables da nosa terra, e de fora tamén...

Asemade, ó abeiro deste encontro tivemos a oportunidade de disfrutar dun maravilloso paseo pola contorna de Santa Mariña de Augas Santas, incluídos o Conxunto Rupestre do Monte do Señoriño de Armea e as "re-escavacións" de Conde-Valvís, ámbalas dúas intervencións presentadas dun xeito ameno e próximo polos seus directores. Unha pequena andaina de menos de 3km cun grande interese histórico-artístico, arqueolóxico e natural na que artesanía e arqueoloxía camiñaron da mán durante unhas horas, se cadra é que non estan tan lonxe non????.

Perfil do Monte do Señoriño (tras as árbores do fondo)
dende a cabeceira da Basílica da Asunción no solpor.

Un momento da visita na área escavada por Conde-Valvís nos anos 50 e
"re-escavada" por David Pérez o pasado mes de xullo.

Na nosa conta de Wikiloc podedes descargar o track e os waypoints da ruta:

Visita ó abeiro do II Encontro de Cesteiros de Santa Mariña, "non todo vai ser rupestre"...

2011-08-08T14:06:00.000+02:00

Nunha entrada anterior onde sintetizábamos os nosos obxectivos para o Proxecto de Intervención Arqueolóxica no Monte do Señoriño 2011, comentábamos que un dos nosos propósitos era ofertar á sociedade a posibilidade de achegarse ó xacemento e coñecer in situ como é a actividade arqueolóxica. Unha iniciativa que permitiría rachar cos tradicionais estereotipos sobre os arqueólogos ó tempo que se descubría o espectacular xacemento rupestre que estaba a ser escavado no lugar de Armea. "Unha actividade divulgativa e accesible para toda a sociedade" diciamos no vídeo de presentación do proxecto que resultou tremendamente positiva cun "cheo" absoluto tódolos días de visita en horario de mañá e tarde.

Unha vez rematado o traballo de campo, e á espera da labor de gabinete que implementaremos en setembro e da que daremos cumprida información neste blogue, a nosa aposta por socializar o coñecemento como parte do proceso científico, parafraseando a Manuel Gago nun dos seus interesantes post, continúa tamén neste mes de Agosto. Con tal, ó abeiro do II Encontro de Cesteiros que se celebrará na fermosa vila de Santa Mariña de Augas Santas e facendo un pequeno receso nas nosas vacacións, este sábado día 13 de Agosto estaremos de novo no xacemento para ensinar un pouco e aprender moito máis de tod@s os que vos acerquedes por alí. Agardámosvos. ;)

#7# Proxecto Armea 2011: síntese de resultados da 3ª semana [fin]

2011-08-04T22:31:00.001+02:00

Adolfo Fernández, director do Proxecto de Intervención Arqueolóxica no Monte do Señoriño, preséntanos os eventuais resultados derivados do fin da escavación. Agora teremos que agardar os resultados do laboratorio. ;)

#6# Proxecto Armea 2011: síntese de resultados da 2ª semana

2011-07-22T19:40:00.000+02:00

O encanto dunha escavación arqueolóxica...

2011-07-21T00:01:00.000+02:00

O arqueólogo J.M.Hidalgo Cuñarro comenta hoxe no noso Facebook que tan importante, ou máis, son os resultados da escavación como as persoas que traballan na mesma. Concordamos plenamente con esta afirmación, índa máis cando o equipo participa como voluntari@ coa única recompensa da experiencia vivida.

Co paso dos días as bromas e brincadeiras mestúranse cos achados, como na imaxe tomada na tardiña de hoxe desterrando unha fíbula de bronce, e do compañeirismo xurde a amizade. Dende a organización do Proxecto Armea 2011: Monte do Señoriño, agardamos que @s nos@s compañeir@s de escavación esten a vivir coma nós unha grande experiencia.

Visitas e máis visitas...

2011-07-19T22:41:00.001+02:00

Hoxe ás 11 da mañá o xacemento rupestre do Monte do Señoriño era un fervedoiro de xente, era día de visita. Non foi a única, á visita de onte do catedrático Marco V. García Quintela, quen non dubidaba en reafirmar de novo a funcionalidade cultual do conxunto, sumábase hoxe a do catedrático Antonio Rodríguez Colmenero quen, índa que admitindo a posibilidade desta hipótese, segue a pedir cautela até que rematen as escavacións arqueolóxicas. Teremos que seguir traballando:

Labor omnia vincit improbus

Veciñ@s e turistas atenden e entenden con tódolos sentidos as explicacións da nosa compañeira Natalia.

Marco V. Quintela conversa con Adolfo Fernández sobre a disposición das canalizacións rupestres.

Antonio R. Colmenero procurando algún indicio concluínte no que semella ser unha gran pía triangular.

Rachando estereotipos...

2011-07-19T01:57:00.000+02:00

Recuperando unha vella reflexión dos colegas da Lanzada sobre os tópicos instalados na sociedade sobre o traballo arqueolóxico recuperamos esta secuencia de ferramentas usadas na nosa escavación do Monte do Señoriño: sacho, pa, machado, serras... e logo que foi do látego Indiana? ;)

O Proxecto Armea 2011: Monte do Señoriño nos medios de comunicación

2011-07-18T23:17:00.000+02:00

Nas ligazóns axuntas podedes visionar e ler as últimas notas de prensa derivadas das nosa intervención no Conxunto Rupestre do Monte do Señoriño en Armea (Santa Mariña de Augas Santas, Allariz-Ourense).

La Región (17/07/2011):
http://www.laregion.es/noticia/162614/culto/castrexo/asoma/armea/

Capítulo 0 (17/07/2011):

http://www.manuelgago.org/blog/index.php/2011/07/17/primeiros-resultados-das-escavacions-do-posible-santuario-rupestre-de-armea/

Telemiño (18/07/2011):
http://www.youtube.com/user/teleminho#p/u/5/RLa0Rw9ohVI

TVE (18/07/2011):
http://www.rtve.es/alacarta/videos/telexornal-galicia/telexornal-informativo-territorial-galicia-18-07-11/1156101/
(a partir min. 12)

#5# Proxecto Armea 2011: síntese de resultados da 1ª semana

2011-07-16T22:36:00.001+02:00

Nunha entrada anterior comprometémonos a ir contando en tempo real a evolución da nosa intervención no Monte do Señoriño de Armea (Santa Mariña de Augas Santas, Allariz). Con todo, optamos por editar os vídeos para darlle unha estructura lóxica, o que obrigábanos a retrasar a súa publicación. Así, en tempo "case que real" cunha semana de diferencia, presentamos os eventuais resultados da primeira semana de escavación. Pronto máis e mellor. ;)

#4# Proxecto Armea 2011: implementar a escavación arqueolóxica

2011-07-16T22:17:00.000+02:00

Seguimos coa serie de vídeos sobre o Proxecto de Intervención Arqueolóxica no Monte do Señoriño 2011 na nosa canle de YouTube. Presentamos agora os primeiros chanzos superados no proceso de escavación.

#3# Proxecto Armea 2011: a intervención arqueolóxica

2011-07-16T16:07:00.000+02:00

Despois dos faladoiros colados estos días na nosa canle de YouTube, dentro da serie de vídeos sobre o Proxecto de Intervención Arqueolóxica no Monte do Señoriño 2011, presentamos agora a programación da escavación arqueolóxica da mán do director do proxecto Adolfo Fernández.

Investigación, formación e divulgación...

2011-07-15T01:28:00.000+02:00

No ecuador da nosa intervención no Conxunto Rupestre do Monte do Señoriño comezamos a albiscar algúns resultados. Se ben índa non podemos afirmar nada no referido á funcionalidade do lugar, outros obxectivos semellan estar no bo camiño como a labor formativa dirixida ós voluntarios ou a interacción coa comunidade local e cos numerosos visitantes da vila de Allariz, cun nutrido grupo de visitas recibidas tódolos días e a todas horas. Moito máis que arqueoloxíA.

#2# Proxecto Armea 2011: a corta dos carballos e a limpeza

2011-07-14T01:17:00.001+02:00

No vídeo anterior presentábamos o primeiro dunha serie de vídeos que iremos colando na nosa canle de YouTube co obxectivo de comunicar a evolución da nosa intervención no Monte do Señoriño en tempo real. Con tal, agora colamos as primeiras observacións do director do proxecto (A. Fernández), na boa compaña de Manuel Losada, no momento xusto de cortar os carballos e limpar a área afectada pola nosa intervención. Pronto máis e agardamos que mellor. ;)

Asemade, tamén podedes dar un paseo da mán deste arqueólogo polo xacemento en pleno proceso de limpeza no noso Facebook.

#1# Proxecto Armea 2011: o proxecto

2011-07-12T23:22:00.004+02:00

Velaquí o primeiro dunha serie de vídeos que iremos colando na rede na medida das nosas posibilidades. Non somos Scorsese pero o importante é ir contando en tempo real a evolución da nosa intervención no Monte do Señoriño de Armea (Santa Mariña de Augas Santas, Allariz). Pronto máis e agardamos que mellor. ;)

Proxecto Armea 2011: nós tamén abrimos por obras...

2011-07-04T02:23:00.000+02:00

Seguindo a excepcional proposta do videoblog d@s compañeir@s da Lanzada, presentamos aquí o primeiro dunha serie de vídeos nos que tentaremos (na medida das nosas posibilidades) ir contando en tempo real a evolución da nosa intervención no Monte do Señoriño de Armea (Santa Mariña de Augas Santas, Allariz).

Neste primeiro audiovisual Manuel Losada, responsable da descuberta do xacemento rupestre, e máis o director da intervención Adolfo Fernández comentan na fermosa tardiña do sitio o inminente inicio da intervención. Pronto máis e mellor.

Armea en RNE

2011-07-01T00:21:00.000+02:00

Na banda de reproducción inferior podedes escoitar unha pequena síntese das intervencións programadas por nós en colaboración cos arqueólogos David Pérez e Celso Barba no conxunto arqueolóxico, histórico-artístico e natural de Armea (Santa Mariña de Augas Santas, Ourense).

(a partir do min. 13)

Fonte:
http://www.rtve.es/alacarta/audios/cronica-de-galicia/galiciaen-risco-extremo-incendioscronica-galicia/1142154/

«Finis coronat opus» 2

2011-06-29T20:10:00.000+02:00

Na entrada do 3 de maio de 2011, co gallo da reseña que o xornal Faro de Vigo facía da tese de doutoramento do noso compañero Adolfo Fernández, publicitábamos a súa pronta defensa perante tribunal*. A organización primeiro das xornadas sobre Cultura Castrexa en Xinzo e da intervención arqueolóxica das próximas semanas no conxunto rupestre do Monte do Señoriño (Armea, Santa Mariña de Augas Santas-Allariz), supeditou até hoxe a merecida difusión deste traballo calificado con Sobresainte Cum Laude. Con tal, e agardando unha pronta publicación do conxunto da obra, axuntamos aquí o resumo da obra en .pdf ofrecido polo autor. De novo Adolfo parabéns, e máis unha vez <<finis coronat opus>>.

* Fernández Ochoa, C. (UAM), Caamaño Gesto, J.M. (USC), Castro Pérez, L. (UVIGO), Michel Bonifay (CNRS), Rui Manuel Lopes de Sousa Morais (Universidade do Minho).

O xacemento do Monte do Señoriño de novo nos medios.

2011-06-27T13:38:00.000+02:00

O conxunto rupestre do Monte do Señoriño en Armea (Sta. Mariña de Augas Santas, Allariz) segue "dando que falar". Aquí fica o derradeiro artigo que saíu esta fin de semana na revista cultural Auria, suplemento do xornal La Región asinado polo arqueólogo Juán Manuel González Carballo e o xeólogo José Ramón Seara Valero.

Proxecto Armea 2011: sobre as notas de prensa pre-intervención.

2011-06-23T02:02:00.001+02:00

Por mor do "vórtice informativo" que de novo parece estar espertando nos medios de comunicación o proxecto de intervención arqueolóxica no conxunto rupestre do Monte do Señoriño en Armea (Sta. Mariña de Augas Santas, Allariz); coidamos necesario -e máis unha vez- unha pequena crónica que aclare algunhas afirmacións que coidamos, cando menos, pouco atinadas.

Primeiramente, e a diferencia do que se cita nalgúns artigos (1), tal e como xa apuntábamos en entradas pasadas neste mesmo blogue, dende fai aproximadamente un ano o LAUV-GEAAT en colaboración co Concello de Allariz e o Museo Arqueolóxico de Ourense estábamos a implementar o procedemento necesario para recuperar o espacio arqueolóxico, histórico-artístico e natural de Armea (Allariz, Ourense). Posteriormente, a propia entidade municipal de Allariz acordaría cos arqueólogos David Pérez e Celso Barba a intervención no interior do propio castro "tentando recuperalo para a súa visita" (2) e inserir o xacemento na ampla oferta cultural do Concello alaricano.

Os acontecementos precipitáronse cando o domingo 20/03/2011, Manuel Gago publicaba o xa famoso vídeo no que se daba a coñecer por vez primeira a estructura rupestre do Monte do Señoriño localizada tempo atrás por un veciño de Armea (Manuel Losada) e catalogada polo arqueológo Juan Manuel González Carballo, avisado pola Asociación de Estudios de Santa Mariña de Augas Santas.

Fora de interpretacións sobre a súa funcionalidade que analizaremos noutras entradas, este achado aceleraba a necesidade dunha pronta actuación na contorna. Agora non só co fin de revalorizar o conxunto, senón co obxectivo de protexer a estructura das numerosas visitas recibidas a posteriori de facerse pública a descuberta como apuntaba o teletipo da Axencia EFE e citado en numerosos medios dixitais. Así, dende o LAUV-GEAAT e baixo petición expresa do Concello de Allariz iniciamos os trámites para desenvolver esta actuación de emerxencia. Unha intervención programada para o mes de xullo.

En conclusión:

1º) O Plan Director sobre o Conxunto Arqueolóxico, Histórico-Artístico e Natural de Armea non foi motivado pola aparición da estructura rupestre do Monte do Señoriño. A súa redacción índa está en proceso e require dun longo proceso de reflexión para garantir a necesaria multivocalidade do conxunto, permitindo tanto o seu estudio e conservación -requerido tanto pola Universidade como polo Museo Arqueolóxico- como o seu disfrute e divulgación apuntado polo Concello de Allariz e a propia comunidade local (Ayán et. al. 2011).

2º) A intervención que se practicará nas próximas semanas responde a dous obxectivos e espacios diferentes índa que necesariamente complementarios:

- a actuación xa apuntada por diferentes medios (3), practicada polo LAUV-GEAAT, cínguese ó Monte do Señoriño e procurará unha consolidación e interpretación das estructuras destapadas por Manuel Losada. Unha intervención que permitirá non só recuperar a información arqueolóxica dispoñible no xacemento, senón a súa correcta consolidación e exposición.

- por outra banda, e seguindo o programa de recuperación previsto (vid supra), os arqueólogos David Pérez e Celso Barba procurarán localizar e recuperar no interior do castro as construccións destapadas por F. Conde-Valvís Fernández a mediados do pasado século. Asemade realizarán diferentes sondaxes na croa procurando albiscar a secuencia de ocupación do xacemento.

3º) Algúns escritos (4) falan dunha hipótese oficial que defende o valor cultual da estructura rupestre fronte outra máis funcional, tipo villae. Na nosa opinión non existe ningunha hipótese oficial. Tal e como apuntábamos no pasado os restos destapados a día de hoxe son todo e nada. Algúns investigadores como os catedráticos da USC Marco García e Antonio Rodríguez Colmenero -asesores científicos do proxecto- apuntan cara a primeira visión e outros como o propio arqueólogo que inventariaba o xacemento cara a segunda. Só unha intervención sistemática, baixo metodoloxía científica lonxe do estereotipo de Indiana Jones, podería axudar a solucionar este debate e incluso esto podería non ser suficiente...polo que teremos que agardar... ;)

NOTAS:

(1) La Voz / Ourense _ 26-03-2011_

(2) La Región / Allariz _ 23-02-2011_

(3) Faro de Vigo / Ourense _ 22-06-2011_

(4) El País / Galicia _ 17-06-2011_

Voluntariado Armea 2011

2011-06-20T16:56:00.000+02:00

Ábrese o prazo de inscrición para participar como voluntari@ na intervención arqueolóxica no Conxunto Rupestre do Monte do Señoriño de Armea (Santa Mariña de Augas Santas, Allariz).

@s voluntari@s participarán nunha intervención arqueolóxica que desenvolverá o Laboratorio de Arqueoloxía da Universidade de Vigo-Grupo de Estudios de Arqueoloxía, Antigüidade e Territorio entre o 4 e o 22 de Xullo na contorna do Castro de Armea sito na parroquia de Santa Mariña de Augas Santas (Allariz).

@s participantes terán a posibilidade de formarse xunto ó equipo técnico nas labores de escavación, levantamento planimétrico, na conservación e restauro, rexistro e tratamento de materiais arqueolóxicos*.

Os gastos de desprazamento (Ourense-Armea-Ourense) e máis a manutención correrá a cargo da organización.

Ofértanse 5 prazas. Para inscribirse enviar un correo electrónico a lauv-web@uvigo.es axuntando un breve Currículo Vitae ata o Luns 27 de Xuño de 2011.

Unha escolma gráfica da xeira castrexa...

2011-06-18T00:11:00.004+02:00

Algunhas fotografías do encontro de Xinzo, no Facebook tedes máis imaxes. ;)

O curso de verán nos media...

2011-06-07T10:22:00.001+02:00

Nestas dúas ligazóns podedes ver as novas sobre o Curso de Verán: "Castros do Interior: A Idade do Ferro do NO Peninsular a través do exemplo limiao" publicadas o 6 e 7 de xuño no Diario da Universidade de Vigo e na Voz de Galicia:

DUVI _ 6/6/2011

La Voz _ 7/6/2011

...unha de romanos??

2011-06-06T01:20:00.000+02:00

Algo extraño acontecía hoxe na contorna de Armea. Nada máis chegar albiscábamos os balcóns e as galerías engalanadas con bandeiras, os colectores a modo de taboleiro de anuncios que informaban dunha eventual recadación, as vereas máis limpas do habitual e un grande número de persoas que semellaba procurar algo.

Ó tempo que descendíamos o camiño cara o conxunto arqueolóxico o tronar de bombas e o repicar das campás espertaba a nosa curiosidade e empurrábanos cara a Basílica da Ascensión case de forma inconsciente. Unha vez alí e o mirar os estandartes decatábamonos do día que era. Hoxe era o día no que se celebraba a famosa "Procesión dos Pendóns". Unha procesión de rogacións que percorre o camiño que hai dende a igrexa parroquial de Santa Mariña ata o castro de Armea. Un percorrido fixo e inalterable no tempo que funde tradición, lenda, historia e moita arqueoloxía. Tanta que ata os romanos nos acompañaron no noso camiñar.

Nesta ligazón á Asociación de Estudios de Santa Mariña podedes mirar algunhas imaxes da procesión doutros anos:

http://usuarios.multimania.es/estudiossantamarina/procesion_dos_pendos.htm.

A UVigo.tv gravará as palestras do curso de verán "Castros do interior: a Idade do Ferro do NO peninsular a través do exemplo limiao"

2011-05-30T17:53:00.000+02:00

De novo, gracias a colaboración da Vicerreitoría de Innovación e calidade/ Servizos Informáticos de Investigación, a UVigo.tv gravará as palestras presentadas no curso de verán "Castros de Interior: a Idade do Ferro do NO Peninsular a través do exemplo limiao".

Deste modo tod@s @s que non podades asistir ó curso teredes a posibilidade de descarga e visionado das palestras presentadas en Xinzo da Limia entre o 13 e o 16 de xuño de 2011. Unha iniciativa cun grande callado como amosan os números de visionado doutras actividades semellantes:

I Xornadas de Novos Investigadores do Noroeste: Arqueoloxía e Territorio _
+ de 3000 visualizacións. (PLAY)

I Curso Práctico de Metodoloxía Arqueolóxica: rexistro e análise de xacementos e materiais _
+ de 2000 visualizacións. (PLAY)

II Encontro de Estudios sobre Cerámica Antiga do NOroeste Peninsular _
+ de 1000 visualizacións. (PLAY)

Tríptico "Castros de interior: a Idade do Ferro do NO peninsular a través do exemplo limiao" / 13-16 de xuño de 2011 / Xinzo da Limia (Ourense)

2011-05-26T09:34:00.000+02:00

Open publication - Free publishing - More castro

"Castros de interior: a Idade do Ferro do NO peninsular a través do exemplo limiao"

2011-05-25T17:38:00.001+02:00

...a Vicerreitoría do Campus de Ourense vén de colar na súa web a lista de cursos ofertados para este verán de 2011 (descarga aquí). Neste tríptico atoparedes os datos de inscrición para un curso organizado por nós baixo o título "Castros de interior: a Idade do Ferro do NO peninsular a través do exemplo limiao". Un encontro, a celebrar en Xinzo de Limia (Ourense) do 13 ó 16 de xuño, que permitirá paliar en parte o déficit de coñecemento vencellado á Cultura Castrexa lonxe do litoral.

Castro de A Saceda (Cualedro, Ourense) -Fot. Mani Moretón-

Mediante o desenvolvemento e exposición dunha temática de especial interese nos nosos tempos, como é o da cultura castrexa, exemplificada a través dos estudios realizados na comarca da Limia e zonas próximas de Ourense, norte de Portugal, Zamora e Asturias; tentaremos ofrecer ós universitarios, docentes e público en xeral un marco de encontro e formación no que poidan profundizar sobre o coñecemento histórico, especialmente aquel que amosa as súas propias raíces locais.

En pouco publicaremos neste blogue tódala información. Seguide atent@s!!

Open publication - Free publishing - More castrexo

O MUSEO Arqueolóxico de Ourense na nosa MEMORIA

2011-05-20T18:54:00.000+02:00

O Museo Arqueolóxico Provincial de Ourense pese a vivir unha situación máis propia dunha película de Buñuel, despois de case unha década fora da súa sede, segue a programar actividades de formación e difusión de cara á cidadanía. Xa en varias entradas pasadas comentábamos a aposta renovadora dos obradoiros de verán para rapaces. Unha actividade promovida pola nosa compañeira Begoña Garrido que descansa na vangarda da arqueoloxía galega, completando a triada funcional clásica da xestión, investigación e difusión coa esquecida didáctica. Mágoa que en tempos de crise o primeiro sitio onde meter a tesoira sexa no eido cultural, agás nos consabidos proxectos megalómanos, índa que ese xa é outro tema... :+

O pasado mércores 18 de maio foi o Día Internacional do Museo. O tema escollido este ano era Museo e Memoria e para celebralo o Arqueolóxico de Ourense organizou dúas actividades paralelas que podedes albiscar nos vídeos axuntos: unha na Sala de San Francisco e outra no Laboratorio de Restauración do centro, sito en Santa María de Europa. Nós tivemos a oportunidade de asistir á segunda, unha acción guiada dun xeito loable polo Conservador-Restaurador Lois Méndez amosándonos o seu quefacer. Con todo, ámbalas dúas actividades contaron cun notable éxito de participación amosando que o MUSEO índa segue vivo na MEMORIA cidadá malia o seu esquecemento noutras esferas. ;)

JIA 2011 Faro (Portugal)

2011-05-18T00:18:00.000+02:00

Fructuosa foi a nosa visita as IV Jornadas de Jovens em Investigaçâo Arqueológica de Faro. Non tanto polas sesións temáticas ás que gostamos de asistir, senón pola posibilidade de entrar en contacto con outros investigadores coas mesmas motivacións e intereses que nós. Con eles, ó igual que con vós, compartimos o noso póster que participaba na sesión: Tecnoloxías dixitais e metodoloxías computacionais no proceso de investigación arqueolóxica.
Especialmente productiva foi a Mesa Redonda coordinada por Estrat Jove, Jaime Almansa, o NAP e ORJIA baixo o estimulante título: ¿Arqueología para qué, Arqueología para quién? onde ideoloxía, economía, identidade, vocación, etc. encheron horas de debate no que xurdiron interesantes iniciativas como a necesidade de mudar o actual modelo de empresa en prol dun modelo máis asociacionista. Estaremos moi atent@s a esta iniciativa. Podedes descargar -namentres non se publican as actas- os resumos nesta ligazón.
O próximo ano máis e mellor na nosa terra. Xa resta menos para o JIA 2012 Compostela.

Ampliado prazo de inscrición para participar no 2º Congreso Internacional de Arqueoloxía de Vilalba (Lugo)

2011-05-09T11:06:00.000+02:00

O vindeiro verán a vila lucense de Vilalba servirá de punto de encontro para "catar" a actualidade arqueolóxica do Norte da Península Ibérica. A capital da Terra Chá acollerá os días 20,21,22 e 23 de xullo o seu 2º Congreso Internacional de Arqueoloxía no que tamén nós participaremos cunha proposta de análise territorial sobre o proceso de sinecismo da Idade do Ferro.

Xa podedes consultar algúns dos resumos confirmados. O prazo de inscrición para participantes remata o 16 de maio. Animádevos a participar ;)

«Finis coronat opus»

2011-05-03T01:34:00.001+02:00

O xornal Faro de Vigo vén de publicar unha pequena reseña da tese de doutoramento do noso compañeiro Adolfo Fernández. Pese a ser unha nova mostra da diverxencia da conceptualización entre investigación e xornalismo, reducindo unha excelente labor de anos baixo o titular booleano de "¿Fue Vigo un puerto de esclavos?", o empregamos de pretexto para publicitar a súa pronta defensa e agardamos tamén que publicación. Parabéns Adolfo, <<finis coronat opus>>.

A. Fernández no I Curso Práctico de Metodoloxía Arqueolóxica

Título da tese	El comercio tardoantiguo (ss. IV-VII) en el Noroeste peninsular a través del registro arqueológico de la ría de Vigo.
Autor/a	Adolfo Fernández Fernández
Directores/aa	Fermín E. Pérez Losada
Departamento	Historia, Arte e Xeografía
Data de depósito	18 de abril de 2011

Situando Armea no espacio...cartográfico

2011-04-22T16:26:00.000+02:00

Xavier Riádigos no proceso de triangulación dende V.G. 22603 - Boa (Taboadela)

Como ben sabedes @s arqueólog@s temos que facer fronte ás veces a unha gama de actividades para as que non temos competencias. Dende coñecementos de urbanismo para os PXOM ata redacción de proxectos para a administración, pasando polo uso de estacións totais, software de deseño gráfico, SIX... Unha situación -denunciada de xeito recorrente polo GEAAT- derivada da carencia dunha titulación específica en arqueoloxía que condena ós profesionais presentes e futuros á autonomía formativa.

Con todo, namentres non chega o momento que as universidades españolas adapten os curricula á realidade laboral, sempre podedes tirar de contactos e a cambio dun bo xantar vos axuden a establecer a planimetría dun xacemento.

Sirva entón este post para agradecer a axuda de tod@s es@s amig@s que colaboran desinteresadamente nos nosos proxectos. ;)

A actividade arqueolóxica torna a Armea

2011-04-14T13:52:00.000+02:00

Onte pola tarde o conxunto arqueolóxico, histórico-artístico e natural de Armea pasaba a ser por unhas horas o laboratorio de prácticas dun grupo de alumn@s da licenciatura de Historia da Universidade de Vigo. Na súa compaña percorrimos a contorna do castro empregando a microtoponimia como única guía do xacemento, tentamos localizar nos valados elementos arqueolóxicos reutilizados e fixemos algún exercicio de prospección con GPS. Con todo, albiscamos que a maior lección foi a que puideron recuperar das verbas dos veciños, auténtica Arqueoloxía da Memoria.

Prospección arqueolóxica con Xeo-Rádar na área dos túmulos III-IV da necrópole das Xunqueiras/Pedreiras no CUVI (Campus das Lagoas Marcosende da Universidade de Vigo)

2011-04-14T11:26:00.000+02:00

A nosa compañeira Beatriz Comendador Rey, seguindo a filosofía xa establecida noutros traballos como o Proxecto Urdiñeira e acorde coa estratexia de visibilización e divulgación da labor investigadora que defendemos dende o GEAAT, vén de crear un perfil denominado Arqueo-CUVI no Facebook para informar do desenvolvemento dos traballos realizados nos xacementos arqueolóxicos que se atopan na contorna do Campus Universitario de Vigo, entre os que destacan a necrópole tumular e o xacemento de Monte das Cabanas. Xacementos que son obxecto dun proxecto integral para o seu estudio e posta en valor promovido pola Vicerreitoría de Extensión Universitaria da Universidade de Vigo.

Os túmulos III e IV da necrópole das Xunqueiras-Pedreiras, coa Serra do Galiñeiro ó fondo

Hoxe mesmo arranca a prospección con Xeo-Rádar na área dos túmulos III-IV da necrópole, un traballo que será realizado pola empresa INGENIERIA INSITU S.L..
A actuación prevista é a prospección non invasiva con equipo de Xeo-Rádar, sen remoción de terras nin alteración do terreo. O Xeo-Rádar XPR é unha ferramenta relativamente nova de inspección non invasiva do subsolo que se basea na emisión e recepción de impulsos electromagnéticos. Actualmente está mellorando os seus resultados en aplicacións arqueolóxicas grazas ós últimos avances no procesamento en tres dimensións. A súa principal vantaxe fronte a outras técnicas non destrutivas, como a prospección magnética, é a súa maior capacidade de resolución das posibles estruturas ou restos enterrados.
O traballo dirixido por Beatriz Comendador consistirá na inspección do subsolo mediante o XPR e o equipo de antena receptora. O XPR detectará os cambios nas propiedades electromagnéticas dos medios atravesados, producindo que parte da enerxía sexa reflectida. A antena receptora disposta na superficie detectará estas sinais xerando una serie de rexistros, permitindo obter una imaxe da historia das reflexións baixo a liña de desprazamento da antena.
O obxectivo principal é valorar a potencialidade arqueolóxica da zona co obxectivo de deseñar unha futura intervención arqueolóxica, tanto da zona dos túmulos, como do espazo contiguo. Procurando obter información tanto sobre a presenza de estruturas (estrutura intratumuluar, aneis, coirazas…) como de posible estruturas negativas.

Agardamos con inquedanza os resultados, namentres podedes facervos unha idea do seu potencial con este vídeo dun traballo semellante neste caso aplicado á cidade romana de Empúries. ;)

+ vídeos na nosa canle de Youtube: http://www.youtube.com/user/LAUVGEAA

Bosquexo do xacemento rupestre do Monte do Señoriño de Armea

2011-04-04T23:56:00.000+02:00

Unha pequena mostra do que albiscamos a día de hoxe, con anterioridade á intervención, no Monte do Señoriño. En pouco compartiremos máis detalles do proxecto. ;)

Antonio Rodriguez Colmenero visita o achado de Armea

2011-03-28T02:13:00.001+02:00

Tal e como adiantábamos en anteriores entradas, o equipo do LAUV-GEAAT vén de implementar o plan de traballo que permitirá interpretar dende a perspectiva arqueolóxica o achado do señor Manuel Losada na contorna do conxunto arqueohistórico e artístico de Armea (Allariz). Con tal, paralelamente á redacción con carácter de "urxencia" do proxecto de escavación -por mor das numerosas visitas ó lugar- iniciamos os contactos cos diferentes especialistas en complexos rupestres que conformarán a asesoría científica.
Hoxe achegábase ó xacemento o catedrático da Universidade de Santiago de Compostela Antonio Rodríguez Colmenero (c.v.), autor de numerosas publicacións relacionadas cos santuarios galaico-romanos. Ante a "pregunta do millón" sobre a funcionalidade do lugar, Rodríguez Colmenero apuntaba que a hipótese cultual poderíase soster na importancia do Monte do Señoriño como manancial e lugar de culto á auga aínda na actualidade, a distribución do que poderían ser canalizacións, a coidada labra do "bancal" e incluso, coincidindo con García Quintela, na semellanza entre a regularidade e homoxeneidade das escadas visibles no lugar con santuarios como o de Argeriz en Valpaços. Con todo, en referencia a este último apunta unha maior complexidade no caso de Armea por mor a súa distribución en varias plataformas e a súa excepcional dimensión.
Namentres, por outra banda, para a hipótese funcional Rodríguez Colmenero localizaba in situ o que poderían ser negativos de construccións habitacionais, polo que aconsellaba ser cautos e agardar ata os resultados dunha escavación sistemática. Polo que teremos que seguir agardando. ;)

Antonio R. Colmenero visita ó achado do señor Manuel Losada (27/03/11)

Agradecementos:

Queremos aproveitar este recurso para agradecer a colaboración de Antonio Rodríguez Colmenero e a súa disposición para visitar o lugar, índa máis un día festivo e de choiva.

A vida segue logo do achado de Armeá...

2011-03-25T10:58:00.000+01:00

Índa que a nosa axenda alterouse estos días co achado do señor Manuel Losada de Armeá, e na actualidade mesmo seguimos a traballar tanto no proxecto de intervención no lugar como no propio plan director para o conxunto, semella que o vórtice informativo perde intensidade. Con todo, podedes consultar a última entrada de Manuel Gago no seu blogue Capítulo 0 onde analiza os paralelos entre o santuario de Argeriz en Valpaços e o achado de Armeá en Allariz. A nosa opinión ............. só despois da escavación. ;) Con todo, e na liña do que apunta Sande Lemos (ó que agradecemos a súa colaboración) no noso Facebook , a morfoloxía de Armeá semella máis complexa.


Arriba: Argeriz / Abaixo: Armeá

Pero como dicíamos a vida segue e a nosa actividade tamén, con tal aquí fica o programa da sesión: Tecnoloxías dixitais e metodoloxías computacionais no proceso de investigación arqueolóxica, dentro das IV Jornadas de Jovens em Investifaçâo Arqueológica nas que participaremos. As xornadas, que se celebrarán entre os días 11 e 14 de Maio de 2011 en Faro (Portugal), son unha oportunidade única para presentar os nosos traballos ante outros investigadores, facilitando o seu contacto e cooperación. Algo semellante o que pretendíamos coa celebración das IXNINO.

Toda a información das xornadas aquí: http://www.jia2011.com/index.php?option=com_content&view=article&id=7&Itemid=2&lang=pt . Pronto subiremos o noso póster. ;)

A primeira opinión dun especialista apunta cara a funcionalidade do achado do señor Manuel Losada de Armeá como un santuario rupestre

2011-03-23T23:36:00.002+01:00

Despois do noso intento por contextualizar o achado na contorna de Armeá na entrada anterior, o vórtice informativo continúa. Hoxe mesmo no Telexornal Serán da TVG o profesor da USC García Quintela, que tentaremos forme parte da asesoría científica do noso proxecto, vén de apostar claramente pola adscrición tipolóxica do achado do señor Manuel Losada como un "santuario rupestre do tipo ben coñecido no norte de Portugal". Aventura tamén unha posible cronoloxía que podería abarcar na súa opinión "un longo período partindo dende a Idade do Ferro".

(se non vos aparece o menú de reproducción para visionar o vídeo facede "click" en www.agalega.info)

"Tómate un respiro, tómate un proxecto de investigación"

2011-03-23T13:22:00.004+01:00

Por mor do vórtice informativo destos días no referido o achado na contorna de Armeá, en sintonía cos principios de visibilización e divulgación da labor investigadora que defendemos dende o LAUV-GEAAT, lonxe de calquer mostra de escurantismo que nada aporta a salvagarda e coñecemento do noso patrimonio; coidamos necesario unha pequena crónica de todo o acontecido ata agora.

Como era coñecido por tod@s dende fai aproximadamente un ano, e recollido nos medios* nos últimos meses, dende o LAUV-GEAAT-en colaboración co Museo Arqueolóxico de Ourense, o Concello de Allariz e os arqueólogos David Pérez e Celso Barba- estamos a implementar o procedemento necesario para recuperar o espacio arqueolóxico, histórico-artístico e natural de Armeá (Allariz, Ourense). Un xacemento, cunha riqueza simbólica sen parangón, esquecido nas últimas décadas pola arqueoloxía galega (González Soutelo, 2007).

Guerreiro da Cibdá de Armea, Allariz

O noso obxectivo pasa pola recuperación, estudio e divulgación non só das estructuras e materiais asociados ó xacemento arqueolóxico senón da memoria aínda viva do lugar. Estamos non só ante un xacemento cun potencial prometedor para comprender a evolución do poboamento dende a protohistoria ata os nosos días, senón tamén ante un lugar de culto aínda vivo para a comunidade, polo que calquer intervención deberá contar coa súa aprobación e participación. Deste modo, o que pretendemos é visibilizar un dos enclaves patrimoniais máis ricos e complexos do Noroeste da Península Ibérica. Simplemente recollemos a chamada de atención lanzada xa por F. Conde-Valvís Fernández (1950-1951; 1959), única persoa que ata o momento escavou no conxunto, quen recomendou a posta en valor dos restos destapados que, polo esquecemento xeral, foron esmorecendo ata desaparecer e hoxe mostrarse ilocalizables. Un obxectivo respaldado por moitos persoeiros da cultura galega e ourensá de onte e de hoxe, dende Ferro Couselo ata Fariña Busto (2002).

Planimetría escavación Conde-Valvís (1959)

O pasado domingo 20/03/2011, Manuel Gago no seu fantástico blogue Capítulo 0 publicaba un vídeo no que amosaba da mán dun veciño de Armeá, Manuel Losada, o que el denominaba "posible santuario galaicorromano da cidade de Armea". Un xacemento de dificil caracterización catalogado pouco tempo antes (20/02/2011) pola Asociación de Estudios de Santa Mariña de Augas Santas e o arqueólogo Juan Manuel González Carballo que o adscribía á época romana a partir da lectura dos poucos restos cerámicos detectados en superficie e algunhas "tegulas de tipo plano e fragmentos de imbrices".

A semente botada pola encomiable labor de divulgación de Manuel Gago daba os seus froitos en poucas horas cando unha morea de curios@s, especialistas ou non, visitaban de xeito virtual o achado do señor Manuel Losada.
Ó día seguinte a TVG, consciente da repercusión do vídeo e do propio achado, púxose en contacto con Manuel Gago para cubrir a nova. O xornalista de Capítulo 0, coñecedor do proxecto de investigación implementado para Armeá, derivou o contacto cara nós. Deste xeito, como ben dí Manuel Gago no seu blogue, "os arqueólogos puideron achegarse a Armeá a coñecer o lugar, pero tamén o conxunto da cidadanía puido informarse".

(se non vos aparece o menú de reproducción para visionar o vídeo facede "click" en www.agalega.info)

O vórtice informativo seguía medrando cando onte, 23/03/2011, de novo a TVG achegábase a Armeá para cubrir a visita de Francisco García, alcalde de Allariz, quen facía firme o seu compromiso co orixinario proxecto de investigación, agora integrando tamén o novo achado que será escavado con carácter de urxencia nos próximos meses.

(se non vos aparece o menú de reproducción para visionar o vídeo facede "click" en www.agalega.info)

¿PERO QUE É EXACTAMENTE O ACHADO DO SEÑOR MANUEL LOSADA?

A día de hoxe é todo e nada. Se ben é certo que a súa morfoloxía, as escadas, as canalizacións ... poderían ter paralelos nos denominados santuarios rupestres galaicorromanos como ben dí Gago, tamén é certo que poderíamos estar simplemente ante rebaixes funcionais, algún tipo de construcción productiva ou construccións habitacionais como apunta o propio Juan Manuel González Carballo na ficha do inventario.
O seu emprazamento apunta ademáis á zona con ocupación máis tardía, algo a ter en conta á luz da importancia do lugar como zona de difusión de igrexas prerrománicas, abundante documentación relacionada con Celanova e Ourense que falan dun poboamento aldeán maduro para o século IX como apunta o medievalista Alvaro Rodríguez.
É por todo que a día de hoxe, nun estado embrionario, nada podemos afirmar. Agardamos que tanto a intervención dos próximos meses, como a asesoría de diversos especialistas poidan aportar máis luz. Con tal, recuperando unha vella promesa: acendemos fachón dende Armeá.

Seguiremos informando. ;)

Agradecementos:

Queremos aproveitar este recurso para agradecer a Manuel Gago que contara con nós dende o inicio, ó Alcalde de Allariz pola súa confianza e compromiso na salvagarda, investigación e difusión do patrimonio, ós diferentes especialistas que colaboran desinteresadamente: Álvaro Rodríguez, Antonio R. Colmenero, Brais X. Currás, Sande Lemos... e especialmente a Manuel Losada, unha ledicia de persoa cun amor encomiable polo patrimonio.

Bibliografía empregada no texto:

Conde-Valvís 1959: CONDE-VALVÍS FERNÁNDEZ (F.) – Dos villas romanas de la Cibdá de Armea, en Santa Mariña de Augas Santas, en Revista de Guimarães, 69, 1959, p. 472-500.

Fariña Busto 2002: FARIÑA BUSTO (F.) – Santa Mariña de Augas Santas, Serie: Guías do Patrimonio Cultural 7, Fundación Caixa Galicia-Grupo Marcelo Macías, 2002.

González Soutelo 2007: GONZÁLEZ SOUTELO (S.) – Dos yacimientos gallegos olvidados: Moraime (Muxía, A Coruña) y Armeá (Sta Mariña de Augas Santas, Allariz, Ourense), en Gallaecia, 26, 2007, p. 69-84.

Notas:

* La Región (23-02-2011)

O achado nos xornais:

http://www.lavozdegalicia.es/ourense/2011/03/23/0003_201103O23C9995.htm

O EQUIPO turquíA 2011 de novo engaiolado...

2011-03-16T18:04:00.000+01:00

Hoxe nos corredores do Edificio de Ferro albiscamos ó lonxe algúns integrantes do EQUIPO TURQUÍA 2011. Entre olleiras e bocexos tornaban á gaiola. Namentres os exames, os traballos e as prácticas enchían o seu tempo, semella que os seus pensamentos aínda ficaban por terras orientais...

Benvidos compañeir@s, o próximo ano máis!!!!

EQUIPO TURQUÍA 2011

Imaxes: Sesi Martínez

Neve, ventos e ovellas dende Turquía...

2011-03-09T23:36:00.000+01:00

Chegan novas do EQUIPO TURQUÍA 2011, reproducimos aquí o seu comunicado completo, literal e sen censuras:

(...) Tudo bem desde Turquia. Nada maýs que baýxo cero en Istanbul, nevando en Troya, ventos de 100 kms en Assos (que provocaron que ------ voara contra as columnas do templo; non rompeu nada pero casý), unha ovella cruzada e atropelada (non por nos senon polo coche da polýcýa), a camara estropeada hoxe (ten un problema mecanýco e non graba as fotos). Ou sexa, todo normal. (...)

Sigue interesad@ en contratal@s?????????????? Segur@???????????????????

EQUIPO turquíA 2011

...de novo mellorando a grella da TV.

2011-03-08T22:44:00.001+01:00

A UVigo.tv, na súa mediateca pública, vén de presentar a posibilidade de descarga e visionado das palestras presentadas nas I Xornadas de Novos Investigadores do Noroeste: Arqueoloxía e Territorio celebradas na Facultade de Historia de Ourense o pasado mes de novembro.

Moito mellor que o 3D non? ;)

MÓDULO A:
SIX e territorio no estudio da Prehistoria, Protohistoria e Historia Antiga do NO.

MÓDULO B:
Territorio, poboamento e estructuración social do NO ó abeiro dos asentamentos tipo castro.

MÓDULO C (sesión de mañá):
Gallaecia romana: a construcción dun territorio.

MÓDULO C (sesión de tarde):
Gallaecia tardoantiga: a transformación dun territorio.

EQUIPO TURQUÍA 2011

2011-03-04T12:00:00.000+01:00

(...) En 2011, 15 dos mellores homes e mulleres da Facultade de Historia de Ourense, foron engaiolad@s por un sistema académico decimonónico. Non tardaron en fugarse do Edificio de Ferro no que se atopaban pres@s. Hoxe, procurad@s aínda polas "autoridades competentes", sobreviven como arqueólog@s de fortuna en Turquía. Se vostede ten algún problema e @s atopa, se cadra pode contratal@s… son o EQUIPO TURQUÍA 2011 (...)

EQUIPO turquíA 2011

Boa viaxe compañeir@s!!!

Xa temos o programa de prácticas de campo 2011

2011-02-23T00:07:00.000+01:00

Viaxe de estudios á Meseta Norte: visita a Museos e xacementos arqueolóxicos de Palencia, Burgos, Soria, Madrid, Toledo, Ávila e Valladolid

Datas: 12-13-14-15 de Maio 2011 (xoves, venres, sábado e domingo) [4 días]

PROGRAMA

DIA 12 (xoves)

Desprazamento Ourense-Saldaña (Palencia)

Visita ó Museo Arqueolóxico de Saldaña e á Villa romana de La Olmeda.

Almorzo en Saldaña.
Desprazamento Saldaña-Peñalba del Castro (Burgos)

Visita á cidade romana de Clunia.

Desprazamento Clunia-Aranda de Duero
Aloxamento en Aranda de Duero (Albergue Xuvenil).

DIA 13 (venres)

Desprazamento Aranda-Montejo de Tiermes (Soria)

Visita á cidade indíxeno-romana de Tiermes

Desprazamento Tiermes-Madrid.
Almorzo en Madrid

Visita ó Museo Arqueológico Nacional

Desprazamento Madrid-Alcalá de Henares.

Visita ás ruínas visitables da cidade romana de Complutum

Desprazamento Alcalá-Madrid.
Aloxamento en Madrid (Albergue Xuvenil)

DIA 14 (sábado)

Desprazamento Madrid-Carranque (Toledo)

Visita ó Parque Arqueolóxico “Villa romana de Carranque”

Desprazamento Carranque-Toledo.
Almorzo en Toledo

Visita ós Monumentos e Xacementos arqueolóxicos visitables da cidade de Toledo

Desprazamento Toledo-Madrid.
Aloxamento en Madrid (Albergue Xuvenil)

DIA 15 (domingo)

Desprazamento Madrid-Chamartín (Ávila)

Visita ó castro e Centro de Interpretación de Mesa de Miranda

Desprazamento Chamartín-Arévalo
Almorzo en Arévalo.
Desprazamento Arévalo-Almenara de Adaja (Valladolid)

Visita ó Museo de las Villas Romanas.

Desprazamento Almenara-Ourense.

OBSERVACIÓNS

Asistentes: Alumnos e profesores das materias respectivas de Licenciatura e Grao. As prazas sobrantes poderán ser ocupadas por alumnos doutros cursos, doutorandos, investigadores e Licenciados en Historia.

Inscrición: Os alumnos interesados deberán preinscribirse telemáticamente a través da plataforma virtual Tem@ da asignatura correspondente. Esta preinscrición é obrigatoria para reservar praza na viaxe. O prazo de inscrición remata o 18 de marzo.

Transporte en Autobús (50-55 prazas) sufragado pola Universidade.

Aloxamento en Albergues de Xuventude (habitacións mútiples, pequeno almorzo incluído) por conta dos asistentes. Albergues previstos:

Aranda de Duero: Albergue Juvenil Las Francesas

http://www.reaj.com/info-albergue.asp?id=141

Madrid: Albergue Juvenil Sta Cruz del Marcenado (barrio de Argüelles)

http://www.reaj.com/info-albergue.asp?id=114

Albergue Juvenil San Fermín (barrio de San Fermín)

http://www.reaj.com/info-albergue.asp?id=99

Comidas/Ceas libres por conta dos asistentes.

Orzamento estimado: 40 euros por persoa

Aloxamento 32 € + Entradas Museos/Xacementos 8 €
Sistema de pagamento: Ingreso ou transferencia en conta bancaria (Santander, Oficina Campus) nos prazos e contías que se indiquen.

O Mosteiro de Santa Cristina de Ribas de Sil na Idade Media

2011-02-17T13:36:00.001+01:00

Nâo sâo pepitas de oiro que procuro,

Oiro dentro de mim, terra singela!

Busco apenas aquela

Universal riqueza

Do homem que envolve a solidâo

O tesoiro sagrado

De nenhuma certeza

Soterrado

Por mil certezas de aluviâo.

(Fragmento do poema "Prospecçao". Miguel Torga).

Con estas fermosas verbas preséntase un novo número -o 32 xa- dos Anexos do Boletín Auriense promovido polo Grupo Marcelo Macías de Colaboradores do Museo e Arquivo. Unha monografía que recolle a colección documental do Mosteiro de Santa Cristina de Ribas de Sil ó tempo que procura unha síntese histórica da súa evolución.

Esta extraordinaria achega, realizada polo noso colega Víctor Rodríguez Muñíz, constrúese tanto dende unha óptica interna como analizando as relacións do enclave monástico co seu rico entorno, do que o propio autor xa nos falaba na súa comunicación das I Xornadas de Novos Investigadores do Noroeste e que agardamos poder pescudar con máis tempo na pronta publicación das actas na serie de Anejos Herakleion.

Sempre é pracenteiro para nós albiscar como a "canteira" de investigadores vencellados á Facultade de Historia da Universidade de Vigo "seguen na brecha" esquivando as numerosas trabas dos "mercados". Dende o LAUV parabéns Víctor!!

Rodríguez Muñíz, V. (2010): O mosteiros de Santa Cristina de Ribas de Sil na Idade Media, Grupo Marcelo Macías-Serie Anexos Boletín Auriense, Ourense, ISBN: 978-84-88522-28-3.

Nova publicación: “Una gran crátera tardorromana con decoración pintada aparecida en la villa de Toralla (Vigo, Galicia, España)”

2011-01-20T17:01:00.000+01:00

Na web oficial do LAUV, no apartado de publicacións, xa podedes descargar un novo artigo promovido polo grupo. Un traballo no que se presenta o estudio preliminar practicado sobre unha vaixela cerámica singular e excepcional -unha crátera tardorromana con decoración pintada- aparecida na villa de Toralla en Vigo.

Pérez Losada, F. & Fernández Fernández, A. (2011): “Una gran crátera tardorromana con decoración pintada aparecida en la villa de Toralla (Vigo, Galicia, España)” en LRCW 3. Late Roman coarse wares, cooking wares and amphorae en the Mediterranean. Archaelogy and Archaeometry. Comparison between western and eastern Mediterranean, Archaeopress (BAR International Series 2185-I-), Oxford, 2010. ISBN 978 1 4073 0736 7, pp. 149-156.

Nova publicación: “As relacións externas da Gallaecia durante os séculos IV ó VII d.C. a traveso do material importado localizado en Vigo (Galiza)”

2010-12-28T13:39:00.000+01:00

Na web oficial do LAUV, no apartado de publicacións, xa podedes descargar un novo artigo promovido polo grupo. Un traballo no que se analiza diacrónicamente as relacións comerciais do Noroeste dende o século IV ata o século VII a través do rexistro arqueolóxico.

Fernández Fernández, A. (2011): “As relacións externas da Gallaecia durante os séculos IV ó VII d.C. a traveso do material importado localizado en Vigo (Galiza)”, en Pérez Losada, F. (Ed.) Hidacio da Limia e o seu tempo: a Gallaecia sueva/ A Limia na época medieval, Excmo. Concello de Xinzo de Limia (Biblioteca Arqueohistórica Limiá, Serie Cursos e Congresos nº5), Xinzo de Limia, 2011, ISBN 978-84-921946-9-8.

Mirámonos no 2011. Boas Festas!!!

2010-12-23T11:06:00.000+01:00

Sempre que remata un ano tendemos a facer memoria do que fixemos no pasado. A avaliar os 365 días como se algo fose mudar co cambio no calendario cara o mes de xaneiro. Facemos novas-vellas promesas como aprender un novo idioma ou ir ó ximnasio polas mañás. Ser mellores persoas, mellores amig@s, familiares, profesionais...

Pois ben, remata o 2010, un ano de crise, tesoiradas, wikileaks, perda de dereitos sociais, etc.; e no LAUV facemos a nosa particular avaliación do ano, neste caso de xeito gráfico para compartila con todos vós. Sirvan tamén estas imaxes para agradecer a colaboración e o interese de tod@s @s que colaborastes ou participastes en calquer actividade promovida polo LAUV creando entre tod@s un espazo común de traballo e aprendizaxe único. Moitas gracias de novo.

Agardamos que o vindeiro 2011, que enxergamos cheo de mudanzas como xa coñeceredes no seu día, sexa alomenos a metade de produtivo que o presente. Na nosa axenda fican algunhas datas chave como a viaxe de estudios arqueolóxicos a Turquía aló polo mes de marzo, a celebración da xa IIIª edición do Encontro de Estudios sobre Cerámica Antiga do NOroeste Peninsular cara fin de ano, o curso de verán de Metodoloxía Arqueolóxica... e agardamos que moitas cousas máis.

Moita saúde e mirámonos no 2011!!

Nova publicación: “Rías Baixas and Vigo (Vicus Eleni)”

2010-12-16T17:09:00.001+01:00

Na web oficial do LAUV, no apartado de publicacións, xa podedes descargar un novo artigo promovido polo grupo. Un traballo no que a través do estudio da cerámica fina e das ánforas se presenta a importancia de Vigo, en particular, e as Rías Baixas, en xeral, como punto de referencia comercial na fachada atlántica dende época romana.

Fernández Fernández, A. (2010): “Rias Baixas and Vigo (Vicus Eleni)”, en Morais, R. & Carreras, C. (eds) The Western Roman Atlantic Façade: A study of the economy and trade in the Mar Exterior from the Republic to the Principate. ISBN 978 14073 0706 0, England, pp. 229-237.

Máis cabezas que medios.

2010-12-13T17:27:00.005+01:00

"En principio la investigación necesita más cabezas que medios".

Severo Ochoa

Nun tempo de crise, coa privatización de servizos e a involución no sistema universitario inglés; nun tempo de nula inversión en I+D+i da nosa administración, co "colectivo" investigador galego a piques de esmorecer; nun tempo onde a necesidade manda no mercado laboral, mudando a vocación por resultado; o axioma de Ochoa parece perder sentido.

Cristina Fernández, Marta Lorén, Abraham Herrero e Aarón Lakinger. Parabéns ;)

O pasado día 10 de decembro na fermosa cidade portuguesa de Braga parte da equipa xurdida ó abeiro do exemplar Proxecto Urdiñeira, do que xa temos falado neste blogue, presentaban dentro do 1º Congresso Internacional: Povoamento e Exploraçâo de Recursos Mineiros na Europa Atlântica Ocidental a súa comunicación: Unha aproximación etnoarqueolóxica ao traballo do estaño no val do rio Ribeira e a zona do Tameirón (A Gudiña, Ourense, NW Peninsular). Unha palestra, da que agardamos con inquedanza a súa publicación, que se sumaba ó rico debate sobre a producción metalúrxica do bronce no NO entre grandes especialistas xa consolidados de diferentes nacionalidades. Se cadra, na actualidade, o que fai falta son máis medios, ¿non?...

Investigando aos investigadores

2010-12-09T00:24:00.001+01:00

O colega Xosé Gago, colaborador da atractiva serie sobre viaxes, cultura, arqueoloxía e patrimonio De Lorean de Bois no Galicia Hoxe, vén de publicar unha reseña titulada Investigando aos investigadores que podedes consultar tamén no seu blogue. Nesta entrada fai unha interesante síntese do acontecido nas I Xornadas de Novos Investigadores do Noroeste celebradas na Facultade de Historia de Ourense os pasados días 18 e 19 de novembro.

Sen entrar a avaliar os frutuosos debates derivados dos relatorios entre "modelos estáticos" e "dinámicos" que presenta e que a publicación das actas xunto cos vídeos das mesas redondas permitirá analizar con máis calma, varios son para nós -a organización- os puntos chave resultantes dunha primeira lectura desta mordaz e persoal visión do encontro e que vos resumimos a continuación:

_ a "faciana social" que segundo o autor agáchase neste tipo de eventos, corporativista e pechada. Un "mundiño hiperespecializado" afastado doutras realidades.

(...)Calquera evento deste tipo, ten, por suposto, unha faciana social. Unha vertente socializadora, na que os diversos investigadores, aproveitan para poñerse ao día con antigos compañeiros de clase ou amigos. (...)

_ a "faciana política intencionada" deste tipo de "cónclaves" onde o interese pola renovación das universidades mestúrase coa necesidade dos novos investigadores de proxectar os seus traballos cara o exterior, máis aló dos artigos en revistas, de novo especializadas.

(...)Dentro do trazo social hai tamén unha vertente de escaparate. Unha faciana que podemos chamar “política”. Como é lóxico, para un investigador senior, é unha proxección pública importante a “foto” xunto aos novos investigadores. É coma unha foto dun político bicando a un neno. As canas ao carón das espinillas.
Este tipo de eventos dan unha imaxe dinámica, de interese pola renovación, que sempre é de agradecer nas reladas universidades galegas, malia que non sempre teña que corresponderse coa realidade, pois trátase dunha proxección intencionada. (...)

_ a importancia dos "individuos" por riba das institucións que organizan estes eventos. No caso da Universidade de Vigo cunha loanza, que compartimos, a nosa compañeira Bea Comendador.

(...)Como acontece sempre, quen marca a diferenza son os individuos, e a Universidade de Vigo ten a sorte de contar con Bea Comendador, unha rapaza que xa conta coa súa praza de profesora e que está chamada a facer grandes cousas dentro da institución. Só queda agardar que o rodo robotizador universitario non lle pase por enriba modelándoa ou provocándolle hastío, tal e como aconteceu noutros casos, mesmo na USC. Porque no fondo, o sistema investigador universitario é iso. Un sistema de popes e discípulos reproducionista. Un sistema de reprografía. Incluso entre os Novos Investigadores, detectamos certo perigoso conformismo. “Éche o que hai”. (...)

En suma, verbas ácidas e críticas coas que cada quen poderá estar máis ou menos de acordo pero derivadas dos propios obxectivos destas xornadas: dar que falar, comunicar, recibir, transmitir, avaliar, pensar e repensar... Dende o LAUV ficamos moi agradecidos do teu altofalante Xosé. ;)

¿Arquitect@s medindo corredores?. Non, arqueólog@s en prácticas.

2010-11-29T12:04:00.000+01:00

A nosa compañeira de grupo* Bea Comendador vén de remitirnos unhas fotografías das súas prácticas na materia Arqueoloxía Xeral, imaxes que poñen en evidencia, de novo, a necesidade dunha titulación específica en Arqueoloxía no Estado español . Unha carencia formativa da que son vítimas en primeiro termo @s estudantes e titulad@s, e en segunda instancia a sociedade en xeral, que fica privada de profesionais cunha alta capacitación para protexer, investigar e divulgar o seu patrimonio.

No LAUV somos conscientes desta necesidade e nos últimos anos vimos procurando na medida das nosas posibilidades paliar o seu efecto cunha alta carga de formación extra-académica, máis aló dos curricula oficiais (obradoiros, conferencias, saídas de campo...). Actividades cunha alta demanda e cun alto grao de satisfacción por parte dos seus participantes que, ó igual que na imaxe, amosan o seu interese e ilusión por aprender, aínda que sexan un par de horas nos corredores da facultade e non nunha escavación arqueolóxica de verdade.

*Grupo de Estudios Arqueolóxicos e da Antigüidade da Universidade de Vigo (GEAA) do que en pouco teredes novas e que fixa como un dos seus obxectivos prioritarios a demanda dunha pronta consolidación de estudios sólidos en Arqueoloxía na Galicia.

Mafiosos do pasado...

2010-11-25T23:53:00.000+01:00

...os nosos colegas do pioneiro Proxecto Arqueolóxico dos Castros de Neixón, fonte de inspiración para moitos de nós onde probamos as primeiras papas diso que etiquetan como Arqueoloxía Social, veñen de publicar no seu blogue unha entrada sobre as I Xornadas de Novos Investigadores do NO. Mafiosos do pasado é o acertado calificativo proposto para definir o frutífero encontro. Agardamos entón que o Restaurante Al Capone sexa o xermolo dunha nova forma de investigar e comunicar, lonxe de sectarismos e escurantismos doutros momentos. Sexamos mafiosos do pasado contra os mafiosos do presente.

Obrigado Xurxo polas boas verbas. ;)

+ info: http://neixon.blogspot.com

Unha escolma gráfica das I Xornadas de Novos Investigadores do NO: Arqueoloxía e Territorio

2010-11-24T17:59:00.000+01:00

NOVAS DA VIAXE DE ESTUDIOS ARQUEOLÓXICOS TURQUÍA 2011

2010-11-16T12:57:00.000+01:00

Mor a numerosos problemas de xestión da viaxe a organización coida oportuno mudar a data da viaxe ata a "Santa Semana" de 2011, o que aumentará o orzamento inicial entre 80/100 Eur. Con tal, é necesario preinscribirse de novo (aberto o prazo ata o domingo 28 de novembro).
+ info: http://webs.uvigo.es/lauv-web/Turquia2011.html

Seguiremos informando. ;)

Programa XNINO 2010 en pdf.

2010-11-10T18:32:00.000+01:00

Open publication - Free publishing - More noroeste

Cartaz das I Xornadas de Novos Investigadores do Noroeste: Arqueoloxía e territorio.

2010-11-08T18:54:00.000+01:00

Xa temos programa...

2010-11-07T20:26:00.001+01:00

I XORNADAS DE NOVOS INVESTIGADORES DO NOROESTE: Arqueoloxía e territorio.

Facultade de Historia de Ourense 18 e 19 de novembro de 2010

XNINO 2010 As xornadas que se celebrarán por vez primeira na Facultade de Historia do Campus de Ourense nos días 18 e 19 de novembro de 2010, baixo o epígrafe Arqueoloxía e Territorio, pretenden dar saída e constituír un foro de posta en común das numerosas investigacións de índole territorial presentes na arqueoloxía galega na actualidade. Este encontro permitirá concentrar na cidade de Ourense un gran número de especialistas chegados dende diferentes universidades e institucións tanto do estado español (Universidade de Santiago de Compostela, Autónoma de Barcelona, LaPa (CSIC-Santiago), Instituto de Historia (CSIC-Madrid), Deputación de Pontevedra, Museo Arqueolóxico de Ourense...) como doutros países (Universidade do Minho, University College Cork, London University...).

PROGRAMA

XOVES 18 de novembro

09:30 h. Acto inaugural
              Dra. María Lameiras Fernández (Vicerreitora do Campus de Ourense)
              Dra. Milagros Cavada Nieto (Decana da Facultade de Historia de Ourense)
              Dr.   Fermín E. Pérez Losada (Director das xornadas)

10:00 h. MÓDULO A: SIX e territorio no estudio da Prehistoria, Protohistoria e Historia Antiga do NO.
Moderador: Martín Xosé Vázquez Mato (UVigo)

1. Aplicacións dos SIX na análise de depósitos do Bronce Final do NO.
Manteiga Brea, Alejandro (University College Cork)

2. Decisións estratéxicas na Idade do Ferro: localización de poboados dende a óptica da “Rational Choice”.
Barandela Rivero, Israel (Universidade de Vigo) & Rivero Rodríguez, Gonzalo (Instituo Juan March de Estudios e Investigaciones de Madrid)

12:00 h. PAUSA/ CAFÉ

3. Monumentalidade e territorialidade de dous oppida do NO: Lesenho e Briteiros.
Cruz, Gonçalo (Sociedade Martins Sarmento), Fábrega-Álvarez, Pastor & Fonte, Joâo (Laboratorio de Patrimonio, Consejo Superior de Investigaciones Científicas)

4. Unha aproximación á construcción do territorio na Gallaecia romana a través do estudo da movilidade.
Güimil-Fariña, Alejandro (Laboratorio de Patrimonio-USC)

14:00 h. XANTAR DE CONFRATERNIZACIÓN

16:00 h. MÓDULO B: Territorio, poboamento e estructuración social do NO ó abeiro dos asentamentos tipo castro.
Moderadora: Beatriz Comendador Rey (UVIGO)

1. Arte esquemática e hábitat tardoantigo no castro do Castillón (Santa Eulalia de Tábara, Zamora).
Sastre Blanco, José Carlos (Grupo de Investigación y Difusión Sobre el Patrimonio Arqueológico Protohistórico de la Provincia de Zamora/ Asociación Científico Cultural Zamora Protohistórica)

2. Aproximación ao estudo dos castros costeiros de Galicia. Castros Costeiros de Ribadeo, Barreiros e Foz (Lugo).
Maañón, Luis (REVVE ARQUEOLOXÍA S.L.)

18:00 h. PAUSA/ CAFÉ

3. O sitio arqueolóxico de A Lanzada, retrospectiva e novidades.
Rodríguez Martínez, Rafael M. (Deputación de Pontevedra)

4. Os castros de Neixón: paisaxe, sociedade e territorio ao longo da Idade do Ferro.
Ayán Vila, Xurxo (Laboratorio de Patrimonio, Consejo Superior de Investigaciones Científicas)

VENRES 19 de novembro

10:00 h. MÓDULO C (sesión de mañá): Gallaecia romana: a construcción dun territorio.
Moderador: Adolfo Fernández Fernández (UVigo)

1. Transformacións sociais e espaciais no val do Baixo Miño: ss. II a.C.- II d.C.
Currás Refoxos, Brais X. (Centro de Ciencias Humanas e Sociais do CSIC)

2. O papel das augas mineromedicinais na organización do territorio en época romana. Consideracións ó respecto.
González Soutelo, Silvia (Universidad Autónoma de Barcelona)

12:00 h. PAUSA/ CAFÉ

3. Bracara Augusta, a construcción dun espacio urbano.
Magalhâes, Fernanda & Ribeiro, Jorge & Vilas Boas, Cristina (Unidade de Arqueologia, Universidade do Minho)

14:00 h. XANTAR DE CONFRATERNIZACIÓN

16:00 h. MÓDULO C (sesión de tarde): Gallaecia tardoantiga: a transformación dun territorio.
Moderador: Manuel Grande Rodríguez (UVigo)

4. Algunhas reflexións sobre a articulación territorial na Gallaecia tardoantiga.
Sánchez Pardo, José Carlos (Fundación Española para la Ciencia y Tecnología – University of London)

5. A necrópole rupestre de San Vítor (Barxacova, Parada de Sil): grandes necrópoles en espazos deshabitados.
Nieto Muñiz, Eduardo-Breogán & Rodríguez Muñiz, Víctor (Breogán Arqueoloxía – Universidade de Vigo)

18:00 h. PAUSA/ CAFÉ

6. Arqueoloxía tardoantiga e altomedieval en Galicia: investigando nas orixes das sociedades medievais galegas.
Rodríguez Resino, Álvaro. Departamento de Historia I (Universidade de Santiago de Compostela)

20:00 h. Acto de clausura
Fermín E. Pérez Losada – Director das Xornadas (Prof. Tit. Univ. de Vigo)

Mellor tarde que nunca...

2010-10-31T16:41:00.000+01:00

Tras un tempo de pausa na Consellería de Cultura e por extensión na web do Patrimonio Cultural Galego onde ficaban algunhas referencias bibliográficas promovidas por esta, énchenos de ledicia a recente publicación e difusión en formato pdf. das actuacións realizadas en Galicia sobre o patrimonio arqueolóxico do ano 2008, continuando así unha serie xa reiniciada coa edición dos anos 2006 e 2007.

Como dirían algúns... o que vai ben fica ben e sempre mellor tarde que nunca.

Actuacións arqueolóxicas 2008

Xunta de Galicia, Consellaría de Cultura e Turismo

Memoria na que se recollen as actuacións realizadas sobre o patrimonio arqueolóxico no ano 2008. Desta maneira, a Dirección Xeral de Patrimonio Cultural dá a coñecer as súas intervencións en cumprimento da política de difusión das actividades patrimoniais establecida no Decreto 199/ 1997.
Xunta de Galicia, Consellaría de Cultura e Turismo
389 páxs.

Ligazóns

Descargar publicación Actuacións arqueolóxicas 2008

Despois das relacións comerciais tardoantigas unha ollada da prehistoria recente do Salnés e do Mar de Arousa.

2010-10-13T22:51:00.000+02:00

Unha ollada arqueolóxica dende o Monte Lobeira será o título da palestra que presentará a nosa compañeira Bea Comendador no Café Moderno de Pontevedra este venres ás 20:00 horas.

Dende o LAUV queremos convidar de novo a tódol@s interesad@s a asistir e participar nesta exemplar aposta para visibilizar a investigación desenvolvida polo equipo arqueolóxico da Deputación de Pontevedra e do Laboratorio de Patrimonio do CSIC.

+ info: http://apedradoencanto.blogspot.com/2010/10/unha-ollada-arqueoloxica-dende-o-monte.html

NOVAS DA VIAXE DE ESTUDIOS ARQUEOLÓXICOS TURQUÍA 2011

2010-10-07T01:48:00.000+02:00

Aberto prazo de preinscrición ata o 22 de Outubro.
+ info: http://webs.uvigo.es/lauv-web/Turquia2011.html

Seguiremos informando. ;)

O LAUV presentará comunicación ó abeiro das charlas lanzadeiras do proxecto arqueolóxico d'A Lanzada

2010-10-05T22:24:00.000+02:00

As relacións comerciais da Gallaecia durante a época tardoantiga será o tema que presentará o noso compañeiro Adolfo Fernández no Café Moderno de Pontevedra este venres ás 20:00 horas.

Dende o LAUV queremos convidar a tódol@s interesad@s a asistir e participar nesta exemplar aposta para visibilizar a investigación desenvolvida polo equipo arqueolóxico da Deputación de Pontevedra e do Laboratorio de Patrimonio do CSIC.

+ info: http://alanzada.wordpress.com/

Türkiye 2011

2010-10-04T22:59:00.000+02:00

Despois da excelente experiencia da England Archaeological Tour 2010, o LAUV xunto coa Delegación de Alumnos da Facultade de Historia de Ourense xestionará de novo unha viaxe de estudios arqueolóxicos. Nesta ocasión o destino final, consideradas outras opcións e a súa viabilidade, será Turquía.

Continuando coa filosofía doutros anos a viaxe será autoxestionada, é dicer, lonxe de viaxes programados por axencias. Con tal, a nosa proposta pasa por visitar Estambul e a costa xonia aló pola primeira quincena de marzo de 2011. Se estas interesad@ en asistir fica atent@ ás plataformas de difusión do grupo (redes sociais, web, blog...) ou pasa polo Campus Universitario de Ourense (Edificio de Ferro) o vindeiro mércores 6 de outubro na aula 0.6 ás 13 horas.

Seguiremos informando. ;)

Nova publicación: Estudio morfolóxico da escolma cerámica recuperada na Croa de Santa Cristiña ou Castro de Lobosandaos (Lobeira-Bande, Ourense)

2010-09-20T21:40:00.002+02:00

Na web oficial do LAUV, no apartado de publicacións, xa podedes descargar un novo artigo promovido polo grupo. Un traballo no que se presentan as conclusións resultantes do estudio do material cerámico pertencente ó asentamento castrexo toponímicamente recoñecido como "Santa Cristiña ou Lobosandaos". Xacemento localizado no linde dos concellos ourensáns de Lobeira e Bande, que foi obxecto de diferentes intervencións practicadas entre os anos 1982 e 1984 polo hoxe catedrático emérito da Universidade de Santiago de Compostela (USC), Dr. D. Antonio Rodríguez Colmenero.

Vázquez Mato, M.X. (2010): “Estudio morfolóxico da escolma cerámica recuperada na Croa de Santa Cristiña ou Castro de Lobosandaos (Lobeira-Bande, Ourense”, en Larouco 5 ISSN 1130-989x, A Coruña, pp. 103-120.

...o LAUV pretende mellorar a grella da TV.

2010-08-05T02:11:00.000+02:00

A UVigo.tv, na súa mediateca pública, vén de presentar a posibilidade de visionado das xornadas teóricas do pasado I Curso práctico de metodoloxía arqueolóxica: rexistro e análise de xacementos e materiais. Unha oportunidade excepcional de lembrar os consellos e as boas prácticas amosadas nos primeiros días do verán.

...moito mellor que os "remake", "deluxe" ou "mellores momentos" da TV do verán. ¿non?.

boas vacacións a tod@s!!! ;)

Nova publicación: Resultados preliminares de la T.S. Focense (LRC) aparecida en Vigo (Galiza, España).

2010-07-06T18:27:00.003+02:00

Na web oficial do LAUV, no apartado de publicacións, xa podedes descargar un novo artigo promovido polo grupo. Un traballo que presenta a Vigo como un dos portos comerciais máis importantes en época tardorromana.

Fernández Fernández, A. (2010): “Resultados preliminares de la T.S. Focense (LRC) aparecida en Vigo (Galiza, España)”, RCRF XXVI, ISSN 0484 3401, Cádiz, 2008 pp. 375-384.

...non saímos dunha para meternos noutra.

2010-07-06T17:52:00.001+02:00

Aínda coa resaca da intensa semana do I Curso Práctico de Metodoloxía Arqueolóxica: rexistro e análise de xacementos e materiais, a Comisión de Investigación da UVigo vén de publicar as resolucións provisionais para a organización de xornadas e outras reunións científicas, e con esta a admisión da nosa proposta. Con tal, a engrenaxe do LAUV bota andar de novo e énchenos de ledicia difundir a futura celebración das I Xornadas de Novos Investigadores do Noroeste.

O obxectivo desta xuntanza, que tentaremos repetir de xeito bianual, é a de actuar de palestra de interacción para que @s participantes presenten os seus traballos ó tempo que melloran a comunicación con outr@s investigadores. Un propósito sinxelo e inocente en orixe pero non exento de "problemática" como a maioría sabemos...

As xornadas que se celebrarán na Facultade de Historia do Campus de Ourense nos días 18 e 19 de novembro de 2010, baixo o epígrafe Arqueoloxía e Territorio, pretenden dar saída e constituír un foro de posta en común das numerosas investigacións de índole territorial presentes na arqueoloxía galega dende o Calcolítico ata a Baixa Idade Media. Traballos defendidos por investigadores da Universidade de Santiago de Compostela, Universidade do Minho, Autónoma de Barcelona, University College Cork, London University, LaPa (CSIC-Santiago), Instituto de Historia (CSIC-Madrid), Centre Camille Jullian CNRS (Aix-en-Provence), Deputación de Pontevedra, Museo Arqueolóxico de Ourense, o ámbito da arqueoloxía profesional...

Seguiremos informando... ;)

Lembranzas gráficas...

2010-06-25T18:26:00.002+02:00

Rematado o I Curso Práctico de Metodoloxía Arqueolóxica: rexistro e análise de xacementos e materiais, e no tempo que agardamos polo II, colamos aquí unha escolma de fotografías das actividades -a modo de lembranza gráfica dunha boa semana-. Moitas gracias a tod@s pola vosa participación baixo as temperaturas características da cidade "auria". Bo verán!!!!!!!!!!!

"De ética e moralidade vai o conto..."

2010-06-15T16:56:00.000+02:00

No xornal La Voz de Galicia.es do 15/06/2010 veñen de publicar unha entrevista a nosa compañeira Ana Cebreiros quen, ó abeiro da dinámica Área de Historia Contemporánea da Universidade de Vigo, está a visibilizar a labor da Sección Femenina de Ourense. Unha célula básica na correa de transmisión dos valores falanxistas. Un proxecto social que enxergamos prometedor e no que albiscamos boas e interesantes empresas colectivas multidisciplinares.

Fachóns, "nomes e voces" e novas publicacións

2010-06-14T17:26:00.001+02:00

Dende o blog afín A Pedra do Encanto, promovido pola nosa compañeira Bea Comendador, veñen de lanzar unha iniciativa na que a modo de símil compárase a potencialidade comunicativa dos blogs coa luz de guía dos fachóns:

Na Lanzada, cando viñan os normandos ou outras naves inimigas entraban na ría cara o Ulla, acendían fogueira.
Dende a Vila Vella de San Tomé recibían as sinais e na Torre de San Sadurniño acendían fogueira.
Dende a desaparecida Torre da Illa de Arousa recibían as sinais e acendían fogueira.
Posiblemente dende a Torre de Cálogo recibían as sinais e acendían fogueira.
Dende a Torre de Miadelo ou Miradelos recibían sinais e acendían fogueira.

E así ate Catoira (Castellum Honesti) e ate á fortaleza da Rocha, nas aforas de Santiago.

Redes de comunicación, como os blogues.

Xa enviado o sinal dende A Torre do Meadelo, ben podíamos seguir acendendo fachos dende Arousa ate a A Rocha… e comunicarnos máis no mundo da arqueoloxía. Ou non?

http://apedradoencanto.blogspot.com/2010/06/torre-do-meadelo-miadelo-ou-miradelo.html

Sábado 12 de Xuño de 2010

No interior non temos faros de guía, pero fachóns temos dabondo... con tal, non dubidamos en sumarnos a esta proposta e acender o noso facho dende o Laboratorio de Arqueoloxía da Universidade de Vigo. E como se da xustificación de tal proceder fora, dun fachón sito no Barbanza (ARQUEONEIXON) chegan novas interesantes:

a publicación oficial _que xa podedes consultar en rede_ dos tres últimos números da serie CAPA:
21 - Eva Parga-Dans. El Mercado del Patrimonio: nacimiento, estructura y desarrollo delas empresas que gestionan el patrimonio arqueológico.
http://hdl.handle.net/10261/25061

22 - Rebeca Blanco-Rotea. Trabajos arqueológicos realizados en el transcurso de la
redacción del Plan Director de las Fortalezas Transfronterizas del Tramo Bajo del Río
Miño.
http://hdl.handle.net/10261/25002

23 - Yolanda Seoane-Veiga. Propuesta metodológica para el registro del Arte Rupestre de Galicia.
http://hdl.handle.net/10261/25060
a presentación da páxina web do Proxecto "Nomes e Voces", unha iniciativa interuniversitaria que dende o 2006 actúa de altifalante dos silenciados. Botádelle un ollo:
http://www.nomesevoces.net